Тошкент вилоятининг Бекобод тумани ҳокими Шуҳрат Мирзаев 2023 йилнинг 15 декабрь куни кечки пайт хизмат уйидан олиб кетилган. Бу ҳақда “Дарё” журналисти билан суҳбатлашган манба гапириб берди.
Ҳокимнинг қўлга олинганини жамоатчиликка ошкор қилган “Бугун.уз” Шуҳрат Мирзаевнинг коррупцияга қарши курашиш тадбири доирасида бюджет пулларини ўзлаштирганликда айбланиб, ушланганини ёзганди.
“Дарё” айни пайтда ҳокимлик вазифасини бажараётган Шуҳрат Мирзаевнинг қўлга олингани юзасидан қўшимча ахборот олиш мақсадида Тошкент вилояти ҳокимлиги ахборот хизмати масъуллари билан боғланди.
“Бекобод билан боғлиқ эмас”, — деди бу ҳақдаги саволга жавоб қайтарган вилоят ҳокимлиги ахборот хизмати раҳбари Беҳзод Қобулов.
Шуҳрат Мирзаев шу йилнинг 7 август куни Халқ депутатлари Бекобод тумани кенгашининг қарори билан туман ҳокими этиб тайинланганди. У 1982 йил Тошкент шаҳрида туғилган бўлиб, 2004 йил Тошкент молия институтини, 2007 йил Г.В.Плеханов номидаги Россия иқтисодиёт академиясининг Тошкент шаҳридаги филиалини тугатган. 2009 йил Ўзбекистон Республикаси Президенти ҳузуридаги Давлат ва жамият қурилиши академиясини тамомлаган.
Лавозимга тайинлангунга қадар у “Қишлоқ қурилиш банк” акциядорлик тижорат банкининг Бухгалтерия ҳисоби ва ҳисоботи департаменти бошлиғининг ўринбосари вазифасида ишлаб келган.
“Дарё” манбасининг қўшимча қилишича, Мирзаевнинг қўлга олиниши айнан банкдаги фаолиятига бориб тақалади.
Изоҳ (0)