Жанубий Кореядаги Ҳаншин университети 22 нафар ўзбекистонлик талабани амалдаги визалари бўлишига қарамай, мажбуран Ўзбекистонга қайтариб юборди.
27 ноябрь куни 23 нафар Ўзбекистон фуқаросига Сеул ғарбидаги Инчеон халқаро аэропортига йўл олган катта автобусга чиқиш буюрилган. Талабаларнинг таъкидлашича, университет ходимлари автобусда кетаётганда уларни қўрқитишган, агар улар иммиграция марказига борсалар, қамоққа тушишларини ва Жанубий Кореяга қайтишда қийинчиликларга дуч келишларини айтган. Талабаларнинг телефонлари мусодара қилингани айтилмоқда.
Аэропортга етиб келгач, университет ва хавфсизлик ходимлари талабаларни Ўзбекистонга олдиндан буюртма қилинган рейсга ўтқизган. Бир талаба соғлиғи сабабли ўқишдан озод этилган. Университет ўзбекистонлик талабаларни ўқишдан четлаштириш сабаблари қаторига иммиграция ҳужжатларини тақдим этмаслик, ётоқхонадан рухсатсиз чиқиб кетиш, ёмон ўқиш ва одоб-ахлоқ қоидаларига риоя қилмасликни келтирган.
Ҳаншин университети бундай чора муқаррар бўлгани, чунки кўпчилик талабалар иммиграция учун молиявий талабларга жавоб бермаганини билдирган. Университет агар улар ноқонуний равишда қолса, бу келажакдаги халқаро талабаларни рўйхатга олишда салбий таъсир кўрсатиши мумкинлигидан хавотир билдирган.
Талабалар талаб қилинадиган молиявий ҳужжатлар тўғрисида ёлғон маълумотларга алданиб қолганликлари ва амалдаги визалари бўлишига қарамай, ҳатто ётоқхонадан буюмларини олишга ҳам рухсат берилмасдан чиқиб кетишга мажбур бўлганликларини айтиб, университетнинг хатти-ҳаракатларига кескин норозилик билдирди.
Кейинчалик Ҳаншин университети талабаларга, агар улар “мамлакатни ихтиёрий равишда тарк этганликларини” тасдиқловчи ҳужжатни имзолашса, қолган ўқиш тўловларини уларга қайтаришларини маълум қилган.
Ҳозирда тергов полиция ҳамда Ўзбекистоннинг Сеулдаги элчихонаси томонидан олиб борилмоқда. Ўзбекистонлик талабаларнинг Ҳаншин университети тил мактабидан мажбуран четлатилиши хорижлик талабалар учун иммиграция сиёсати билан боғлиқ бўлиб, жумладан, Корея банкида камида 3 ой 10 миллион вон сақлашни талаб қилади.
Хабар қилинишича, талабалар университетдан нотўғри кўрсатмалар олган, уларга пулларни банкда фақат “бир кун” сақлаш кераклигини айтишган. Натижада кўплаб талабалар банкдаги пулларини муддатидан олдин қайтариб олган.
Кейинчалик университет ўқиш муддати “3 ой” экани ҳақида хабар олгач, талабаларнинг “ноқонуний” резидент бўлиб қолиш хавфининг олдини олиш учун уларни шошилинч равишда Ўзбекистонга кетишини ташкил этган.
Ҳаншин университетига кўра, Адлия вазирлиги дастлаб нотўғри кўрсатмалар бериб, вазирлик молиявий мувозанатни сақлаш учун талаб қилинадиган муддатни сентябрь ойида талабалар келишидан бир неча кун олдин бирдан ўзгартирган.
Баъзиларнинг таъкидлашича, университет хатоларга йўл қўйган бўлса-да, Адлия вазирлигининг иммиграцияни бошқариш бўйича масъулиятни таълим муассасасига ўтказиш сиёсатида асосий муаммо бор.
Ташқи ишлар вазирлигидаги манба ҳолат юзасидан “Дарё”га изоҳ берди.
Маълум қилинишича, талабаларнинг чиқариб юборилишига уларнинг Жанубий Кореяда ўқиш ва яшаш тартибини бузгани сабаб бўлган. Гап шундаки, улар ўқиш мақсадида борган бўлса-да, ишлашган ва шу сабабли кўп маротаба дарс қолдиришган. Уларга ишлаш мумкин эмаслиги ва бу ҳолат яна такрорланса, қатъий чора кўрилишидан огоҳлантирилган. Бироқ талабалар бу огоҳлантиришларга қарамай, буни давом эттиришган. Депортациядан бир неча кун олдин 8 нафар ўзбекистонлик талаба ишдан қайтаётганда йўл-транспорт ҳодисасига учраган. Воқеа Кореяда шов-шувларга сабаб бўлган.
Тез орада Ўзбекистоннинг Кореядаги элчихонаси ҳолат юзасидан расмий баёнот бериши кутилмоқда.
Изоҳ (0)