Африкада мавсумнинг энг яхши футболчиси бўлиш учун номзодларнинг якуний учлиги эълон қилинди

2023 йилда Африканинг энг яхши футболчиси бўлиш учун номзодларнинг якуний рўйхати эълон қилинди.

Африка футбол конфедерацияси (CАФ) соврин учун даъвогарлик қиладиган уч нафар футболчи номини эълон қилди.

Муҳаммад Салоҳ (“Ливерпуль”, Миср), Виктор Осимҳен (“Наполи”, Нигерия) ва Ашраф Ҳакими (“ПСЖ”, Марокаш) Африкада йилнинг энг яхши футболчиси бўлиш учун кураш олиб боради. 

Энг яхши дарвозабон соврини учун Андре Онана (“Манчестер Юнайтед”, Камерун), Яссин Буну (“Ал-Ҳилол”, Марокаш) ва Муҳаммад аш-Шенави (“Ал-Аҳли”, Миср) каби киперларнинг номзодлари қўйилган.

Энг яхши мураббий соврини учун қуйидаги мутахассислар кураш олиб боради: Валид Реграги (Марокаш терма жамоаси), Алиу Сиссе (Сенегал терма жамоаси) ва Абдулҳақ Беншиха (“Симба”).

Ғолиблар конфедерация техник қўмитаси, журналистлар, бош мураббийлар терма жамоаси сардорлари овозлари натижасига кўра аниқланади.

2022 йилда Африканинг энг яхши футболчиси совринини “Бавария” сафида тўп сурган Садио Мане қўлга киритганди.