Навоий вилоятининг Қизилтепа туманида электр энергиясидан ноқонуний фойдаланган майнинг ферма аниқланди. Бу ҳақда “Ҳудудий электр тармоқлари” матбуот хизмати хабар берди.
Маълум қилинишича, ушбу майнинг ферма “Ҳудудий электр тармоқлари” Навоий ҳудудий филиали ҳамда ҳуқуқни муҳофаза қилувчи орган ходимлари ҳамкорлигида рейд тадбирлари давомида аниқланган.
Қизилтепа тумани “Яшнаобод” маҳаллаласи ҳудудида жойлашган “Хайрулло-Нарзулло” фермер хўжалигига тегишли дала шийпонида электр ҳисоблагичсиз, ўзбошимчалик билан 47 дона майнинг қурилмалари, совутиш ва ёриткич мосламалари ҳамда бошқа электр қурилмаларини тўғридан тўғри электр тармоғига улаган ҳолда, ноқонуний фойдаланиб келинаётгани аниқланган ҳамда мазкур ҳолат бўйича далолатнома расмийлаштирилган.
Дастлабки қайта ҳисоб-китобларга кўра, “Хайрулло-Нарзулло” фермер хўжалиги томонидан филиал манфаатига 484,8 минг киловатт ёки 436,3 миллион сўм зарар етказилгани аниқланган.
Мазкур ҳолат юзасидан президентнинг тегишли қарорларига асосан ноқонуний фойдаланилган майнинг фермаларига нисбатан 5 баробар ўсувчи коэффициент қўлланиб, 2,2 миллиард сўм маблағ ундиришга ҳужжатлар расмийлаштирилган. Ҳуқуқбузарга 5 баробар ўсувчи коэффициент билан жарима тариқасида 1,8 миллиард сўм қўшимча ҳисоб-китоб қилинган.
Айни пайтда мазкур ҳолат ҳуқуқни муҳофаза қилиш органлари томонидан ўрганилмоқда.
Октябрь ойида Навоий вилоятининг Кармана туманида давлатга 24,4 миллиард сўм зарар келтирган ноқонуний майнинг ферма аниқланганди. Вилоятда июнь ойида 9,6 миллиард сўмлик, июль ойида эса салкам 1 миллиард сўмлик электр энергиясидан ноқонуний фойдаланган майнинг ферма фош этилган.
Изоҳ (0)