Хоразм вилоятида криминоген вазиятни яхшилаш, жиноятларнинг олдини олиш ва ҳуқуқбузарликлар профилактикасини кучайтириш мақсадида ички ишлар органлари томонидан ДХХ вилоят бошқармаси билан ўзаро ҳамкорликда “Хавфсиз ҳудуд—долзарб қирқ кунлиги” тезкор-профилактик тадбирлари ўтказилмоқда. Бу ҳақда вилоят ИИБ ахборот хизмати хабар берди.
Маълум қилинишича, тадбирлар давомида вилоят ҳудудида турли жиноятларга алоқадор фуқаролар аниқланиб, гумондорларнинг яшаш уйларида ўтказилган тинтувлар жараёнида 4,8 кг дан ортиқ оғирликдаги гиёҳвандлик воситалари, 97 дона психотроп моддалар, 1 та пневматик қурол, 2 та совуқ қурол (бита ва кастет) ашёвий далил тариқасида расмийлаштириб олинган.
Ҳозирги кунда юқоридаги ҳолатлар юзасидан, Жиноят кодексининг 273-моддаси (гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 5-қисми, 276-моддаси 2-қисми (гиёвандлик воситалари, уларнинг аналоглари ёки психотроп моддаларни ўтказиш мақсадини кўзламай қонунга хилоф равишда тайёрлаш, эгаллаш, сақлаш ва бошқа ҳаракатлар), 277-моддаси (безорилик) 2-қисмига асосан жиноят ишлари қўзғатилиб, 3 нафар шахс эҳтиёт чораси сифатида қамоққа олинган. Дастлабки тергов ҳаракатлари ички ишлар органлари томонидан олиб борилмоқда.
Бундан ташқари юқоридаги тезкор-профилактик тадбир давомида тергов ва суд органларидан яшириниб юрган 12 нафар шахс ҳуқуқни муҳофаза қилувчи органлар томонидан ушланган.
Бундан олдин Тошкент шаҳрида профилактик тадбир давомида “Салимбой” номи билан танилган Салим Абдувалиев қўлга олинганди. 1950 йилда туғилган Салим Абдувалиев (248-модда 1-қисми, ўқотар қуролни қонунга хилоф равишда сақлаш) гумон қилинувчи тарзида жалб этилиб, процессуал тартибда ушлангани, “Бахти Ташкентский” лақаби билан танилган Бахтиёр Қудратуллаев 15 суткага қамалгани тўғрисида хабар берилганди.
Изоҳ (0)