Navoiy viloyatida mayning kripto-aktivlari qurilmalarini o‘rnatgan oilaviy korxona faoliyatiga chek qo‘yildi, deb xabar beradi Bosh prokuratura huzuridagi departament.
Qayd etilishicha, departamentning Navoiy viloyat boshqarmasi tomonidan DXX va IIB xodimlari bilan hamkorlikda tezkor tadbir o‘tkazilgan. Tadbirda “O.S.” oilaviy korxonasi rahbari L.H. o‘z uyida mayning kripto-aktivlari qurilmasini umumiy foydalanishdagi elektr tarmog‘iga o‘zboshimchalik bilan ulab, davlat va jamiyat manfaatlariga 984 million so‘m zarar yetkazganligi aniqlangan.
Mazkur holat yuzasidan Jinoyat kodeksining 169-moddasi (o‘g‘rilik) bilan jinoyat ishi qo‘zg‘atilib, tergov harakatlari o‘tkazilmoqda.
Noqonuniy mayning fermalari
Buxoroda davlatga 2,66 milliard so‘mlik zarar keltirgan noqonuniy mayning ferma aniqlangani, Nurafshonda mayning kripto-aktivlari qurilmalarini o‘rnatganlar ushlangani, Andijonda noqonuniy mayning ferma tashkil qilgan shaxs qo‘lga olingani to‘g‘risida xabar berilgandi.
2022-yil sentabrda O‘zbekistonda kripto-aktivlar aylanmasi sohasidagi faoliyatni amalga oshirish uchun yig‘imlar miqdorini belgilash, ularni to‘lash va taqsimlash tartibi to‘g‘risidagi nizom Adliya vazirligida davlat ro‘yxatidan o‘tkazilgan.
Nizomga ko‘ra, O‘zbekistonda mayning va kripto-aktivlar aylanmasi sohasidagi xizmat provayderlari faoliyatini amalga oshiruvchi yuridik shaxslar (mayner va xizmat provayderlari) tomonidan ushbu faoliyatni amalga oshirish uchun yig‘imlar to‘lanadi. Shunga ko‘ra, yig‘imlar mayning faoliyati uchun BHMning 10 baravari (3 million so‘m) miqdorda belgilanadi.
Izoh (0)