Қашқадарё вилоятида яширин ёғ ишлаб чиқариш цехида 235 миллион сўмлик электр энергиясидан ноқонуний фойдаланилгани аниқланди, деб хабар беради Бош прокуратура ҳузуридаги департамент.
Маълум қилинишича, департаментнинг Шаҳрисабз шаҳар бўлими ва ИИБ ходимлари ҳамкорлигида тезкор тадбир ўтказилган. Тадбирда И.В. исмли шахс фуқаро Х.А.га тегишли нотурар бинонинг ёрдамчи хўжалигида яширин цех ташкил этиб, қўлбола усулда ясалган мойжувоз ускунаси ёрдамида истеъмолга яроқсиз ёғ маҳсулотлари ишлаб чиқариб келаётгани аниқланган. У сотиш учун тайёрлаб қўйилган ёғ маҳсулотлари ва ишлаб чиқаришда фойдаланилган бошқа товар моддий бойликлар ашёвий далил сифатида олинган. Шунингдек, И.В. умумий фойдаланишдаги электр тармоғига ўғрилик йўли билан уланиб, жами 235 миллион сўмлик электр энергиясидан ноқонуний фойдаланган.
Худди шундай, департаментнинг Китоб туман бўлими томонидан ўтказилган тезкор тадбирда фуқаро Л.Б. танишига тегишли нотурар бинонинг ёрдамчи хонасида яширин цех ташкил этиб, истеъмолчиларнинг ҳаёти ва соғлиғи хавфсизлиги талабларига жавоб бермайдиган ёғ маҳсулоти ишлаб чиқараётганлиги аниқланиб, 600 литр ёғ, 175 килограмм чигит ва бошқа ишлаб чиқаришда фойдаланилган товар моддий бойликлар ашёвий далил сифатида олинган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
- Сурхондарёда июнь ойида ҳам истеъмолга яроқсиз ёғ маҳсулотлари муомалага киритилишининг олди олинганди.
- Хоразмда бўлса инсон соғлиғи учун хавфли спиртли ичимликларни тайёрлаб келган шахс фаолиятига чек қўйилгани,
- Наманганда 550 миллион сўмлик дори воситалари йўқ қилингани тўғрисида хабар берилганди.
Изоҳ (0)