“Айрилиқ”, “Салом, севги”, “Эгизак ошиқлар” фильмлари ва “Юраклар жанги” сериалидаги ижроси билан мухлисларга яхши таниш бўлган актриса Ситора Алимжонова қишнинг илк куни дунёга келган. Актриса бу йил 31 ёшни қаршилаган бўлишига қарамай, ҳалигача ёш кўринади. Айримларнинг тахминига кўра “конфет” сифатида санъатга кириб келган актриса қандай қилиб муваффақиятга эришди. Келинг, шу ҳақида тўлиқ маълумот берамиз.
Етимликда ўтган болалик
Ситора Алимжонова оилада тўрт фарзанднинг кенжаси ҳисобланади. Унинг акаси ва икки опаси бор. У ҳаётда эришган муваффақиятларида опаларининг ҳиссаси катта экани ҳақида кўп гапиради.
— Бобом санъаткор бўлган, шу боисданми бу соҳага болаликдан қизиққанман. Мактабни битириб Фарғона санъат коллежининг рақс бўлимида таҳсил олганман.
Болалигим жуда гўзал ўтган, тиниб-тинчимайдиган қиз бўлганим учун маймунча дейишарди. Афсуски, онам касал бўлганидан кейин гўзал болалик ҳам ниҳоясига етди. Онам раҳматли оққон касалига чалинганди, анча вақт тўшакда ётди. Ўзимиз унга қарардик, соғайиб кетиши учун ҳаракат қилдик. Афсуски, қанча ҳаракат қилинмасин, инсон белгилаб берилган умрини яшар экан.
Опаларимнинг бири Кореяга, бошқаси эса Фарғонага турмушга чиққан. Отам ҳам оила қурди. Акам эса ўз-ўзи билан банд, унинг фойдаси ҳам зарари ҳам тегмайди.
Онам ўлганидан кейин ёлғизланиб қолганман. Шунда Кореяга турмушга чиққан опам мени олдига чақиртириб олган. Бир муддат у ерда яшаганман, тил ўрганганман. Опамга қолса мени ўша ерда олиб қолиш ниятида эди. Аммо табиатан Ўзбекистондан бошқа ерда яшолмайман, у қадар кўникувчан инсон эмасман, — дейди Ситора Алимжонова.
“Мени конфет актриса дейишган экан”
Ситора Алимжонова актриса бўлишни ният қилмагани ва бу ишга опаси ундагани ҳақида сўзлаб берган.
— Рақсга, қўшиқ айтишга жуда қизиқаман. Аммо айнан актриса бўлишимга Дилдора опам сабабчи. У туфайли режиссёр Дурдона Тўлаганова билан танишганман ва айнан фильмда суратга тушиш учун Ўзбекистонга қайтиб келганман. Ўшанда кўпчилик “Бу конфет актриса, 5 минг АҚШ доллари берган”, деб гапиришган экан. Ростини айтаман, у пайтда бунча пулим бўлмаган. Бўлган тақдирда ҳам роль эмас, машина олиб ҳайдаган бўлардим. 2011 йили кинодаги ҳаёт анча жонли эди. Премьералар кўп бўлар, таклифлар ҳам бугунгидек анча сероб эди, — дейди актриса Ситора Алимжонова.
“Кўнглим бўшлиги панд берди”
Ситора Алимжонова машҳур актриса бўлса-да, олган гонораридан қониқмагани, шу сабаб тадбиркорликка ҳам қўл ургани ҳақида гапирди.
— Актрисаларнинг гонорари у қадар юқори бўлмаган. Шу боис мен ҳам тадбиркорликка қўл уриб кўрганман. Аввалига гўзаллик салони очдим, ўхшамагани учун уни ёпиб, Кореядан маҳсулот олиб келиб сотишни йўлга қўйдим. Аммо тадбиркор бўлиш учун бир оз қаттиққўл бўлиш керак экан. Кўнгил бўшлигим кўп бор панд берди, — дейди Ситора Алимжонова.
“Боламнинг отаси Шоҳруҳ Ҳамдамов, дейишганди”
Машҳурларнинг ҳаёти ҳамиша муҳокама марказида. Ситора Алимжоновани ҳам хонанда Шоҳруҳхон билан ишқий муносабатда экани, аммо қандайдир сабабларга кўра улар бирга бўлолмагани ҳақида гап-сўзлар тарқалганди.
— Шоҳруҳхон билан “Сен кетма” фильмида партнёр бўлганмиз. Томошабинлар ниҳоятда ишонувчан, ким биландир партнёр бўлиб севишганлар ролини ижро этса дарров гап-сўз қилишади. Ким билан роль ўйнаган бўлсам ҳаммаси билан ишқий муносабатда эканим ҳақида гапиришган. Ҳатто, турмушга чиқиб фарзандли бўлганимда боланинг отаси Шоҳруҳ Ҳамдамов деб ёзишганди. Бундай гап-сўзларга эътибор бермайман, — дейди актриса.
Пхукетдаги тўйи…
Актрисанинг яширин тўйи ҳам кўплаб муҳокамаларга сабаб бўлганди. У бирорта интервьюсида нега тўйини Таиландда ўтказишга қарор қилгани ҳақида гапирмаган. Актрисанинг тўйи 2017 йилнинг август ойида Таиланднинг Пхукет оролида бўлиб ўтган. Тўйда актрисанинг 3-4 та энг яқин дўстлари иштирок этган. Актриса куёв кўринмаган суратларинигина оммага намойиш этган. Фақатгина унинг 27 ёшда экани ва тадбиркорлик билан шуғулланишини ошкор қилган холос.
Продюсерлар билан келишолмаган
Актриса Ситора Алимжонова 9 йил аввал хонандалик фаолиятини расман бошлаганди. Афсуски, кўп ўтмай унга продюсерлик қилган компания билан молиявий келишувга эришмай, хонандалик фаолиятига нуқта қўйган. У телелойиҳалар учун Отабек Муталхўжаев билан “Севар ёрим”, Ёдгор Мирзажонов билан “Тегаман” дуэтларини ижро этган. “Йўғуборим” ва “Опажоним” сингари муаллифлик қўшиқларини ҳам ижро этган. У ҳозир тўй хизматларига фақатгина “Опажоним” қўшиғини ижро этиш учун боради.
“Она бўлишни 4 йил кутдим”
Актриса интервьюларининг бирида фарзандини тўрт йил кутгани ва она бўлишда қийинчиликка учрагани ҳақида ҳам сўзлаб берган.
— Мен роса ҳаракат қилдим, даволандим. 4 йил фарзанд бўлмади, орада бир бўлиб тушиб қолди, яна даволандим. Кейин ташлаб қўй, дейишди. Кейин Худо ўзи ғойибидан берди. Кутмаганингизда бўларкан ҳамма нарса, шунинг учун кутмаслик керак экан. Туғруқ жараёнида жуда қийналдим, буни эслашни ҳам хоҳламайман. Мен ўзи оғриққа йўқман. Кўзим кўрмай қолди. Кесарча кесиш йўли билан туғдим, лекин дардни ҳам кўрдим. Операция режалаштирилмади. Боланинг туғилишига ҳали олти-етти соат вақт бор эди, лекин жуда қаттиқ оғриқдан кўзим кўрмай қола бошлади. 6-7 соат ичида нимадир бўламан, деб операцияга рози бўлдим. Лекин бу гапимдан ҳомиладорлар қўрқиб қолмасин. Бу нарсалар ўтиб кетади, ўша куннинг ўзидаёқ туриб юриб кетдим, — дейди Ситора Алимжонова.
“Депрессияга тушиб қолдим”
Афсуски, бу интервьюдан роппа-роса бир йил ўтиб актриса шахсий турмушида омадсизликка учрагани ва ўғлини ёлғиз ўзи тарбиялаётгани ҳақида айтди.
— Ҳаётда ҳамма нарса бўлар экан, шахсий ҳаёт ҳақида ҳадеб гапираверса, қизиғи қолмайди. Ҳозирда Муҳаммадаминнинг отаси билан алоқаси бор, фақат кўришиб туради. Шахсий ҳаётимда ҳеч қандай ўзгариш йўқ, боримни болам ва ижодга бағишладим.
Фарзандимни дунёга келтирганимдан кейин депрессияга тушиб қолдим. Мана шу нарса менда бўлмайди, деб ўйлаган эдим. Ўша пайтлари жуда кўп онамни эсладим. Суратга олиш жараёнларига борсам, боламни онамга ташлаб келдим, деган гапларни эшитиб қоламан. Ҳаётда ҳар бир инсоннинг бир армони бўлар экан. Шунақа пайтда онамнинг йўқ бўлгани бутун умрлик армоним бўлиб қолса керак. Онам оққон касаллигига чалинган эди, “Севги” сериалидаги шу саҳналар менинг ҳаётимга жуда ўхшаш. Онам битта жойда ётган, ҳеч қаери ишламаган, қараганман, — дейди актриса.
“Ҳеч қачон ўғлимни актёр қилмайман”
Одатда, кўпчилик ота-оналар фарзандлари касбини давом эттиришини исташади. Аммо Ситора Алимжонова ўғли санъаткор бўлишини истмаслиги ҳақида айтган.
— Ҳеч қачон ўғлимни актёр қилмайман. Унинг мухлислари санъатдан эмас, спортдан бўлсин. Ҳаттоки болам туғилмаган пайтда ҳам битта спортчи ўғлим бўлади деб ният қилардим. Бўлганда ҳам бутун дунё танийдиган машҳур спортчи бўлади, деганман. Фарзандимни яхши тарбиялаб, Ўзбекистон футболини жаҳон чемпионатига олиб чиқадиган даражада футболчи қилмоқчиман. Ҳозир бор хатти-ҳаракатимни шунга қаратганман, — дейди актриса.
Актриса айни кунда ижоддан кўра кўпроқ вақтини фарзандига бағишлашга қарор қилган. Ўғли Муҳаммадамин билан дунё кезади. Энг яхши сурат ва видеоларини эса мухлислари билан бўлишади.
Изоҳ (0)