Актриса Зарина Йўлдошева Ютубедаги “Яшин TV” каналига берган интервьюсида илк марта отасининг ўлими, меҳрибонлик уйидан уни асраб олишмоқчи бўлишгани ва партнёри билан жиддий муаммога боргани ҳақида гапирди.
— Отам ўлганида 8 ёшда эдим. Онам дадам билан бирга узоқ вақт касалхонада бўлган. Биз синглим билан бувимнинг уйида бўлганмиз. Бир куни ўйнаб юрганимда амаким келиб, дадамнинг вафот этгани ҳақида айтиб қолган, аммо у пайтда вазиятни тўлиқ ҳис қилмаганман. Кейин отамнинг майити бувимнинг уйидан олиб кетилаётганида дадам билан хайрлашиб олишимни айтишган. Ўшандагина дадамнинг қайтиб келмаслигини ҳис қилганман. “Дадам билан кетаман”, деб роса ҳарҳаша қилганман, аммаларим ушлаб қолишган.
Ундан кейин 12 ёшимда онам ҳам оғир касаллик сабаб вафот этган. Уч болага қараш қийин бўлгани учун бувим меҳрибонлик уйига топширишга мажбур бўлган. Ўшанда мени асраб олиш учун эр-хотин келишган, аммо улар билан кетишни истамаганман. “Менинг укам билан синглим бор. Қариндош-уруғларим бизни олиб кетишади”, деганман. Шундан кейин улар кичик ёшдаги қизлардан бирини асраб олишган, — дейди актриса Зарина Йўлдошева.
Актриса энг катта мусибатни болалигида ҳис қилгани, 12 ёшида онасига осма укол қилишга мажбур бўлгани ҳақида гапирди.
— Негадир бувим онамни ўқитишни истамаган экан. Коллежларга имтиҳон топшириадиган куни онамни хонасига киритиб, устидан қулфлаб қўйган экан. Ўшанда онам деразадан қочиб бўлса-да, имтиҳонга борган экан. У СESда ишларди, қўли енгил ҳамшира эди. Дадам касал бўлганида ҳам асосий муолажаларни ўзи қилган экан. Онам хасталаниб қолганида укол қилишни ўргатиб қўйганди. 12 ёш бўлсам ҳам, осма уколларини ўзим қилардим.
Ҳаётимдаги энг оғир кун онам ўлганида содир бўлган. Шунинг учун ҳозир бирор қийин вазиятга тушсам, у қадар тушкунликка тушмайман. Чунки ҳаётимда ундан бир неча бор қийин кунлар содир бўлган.
“Раққоса бўламан”, деганимда бувим жиддий қаршилик қилган. Ўшанда тоғам “Бу қиз онасига тортган, йўқ десангиз, қочиб бўлса ҳам, имтиҳонларига боради”, деганди. Феъл-атворим онамга ўхшайди, қиламан деган ишимнинг уддасидан чиқаман, — дейди Зарина Йўлдошева.
Зарина Йўлдошева ва Шаҳзод Султонов муносабатлари кўп марта муҳокамаларга сабаб бўлган. Аммо Зарина актёр ҳақида гапиришни истамаслигини айтди.
— У ҳақида гапиришни истамайман. Илтимос, менга у актёр ҳақида ҳеч қандай саволларни берманг. Нимадир билмоқчи бўлсангиз, унинг ўзидан сўранг, — дейди актриса.
Актриса ўзидан аввал синглисини турмушга бергани ва эндиликдаги режалари ҳақида тўхталиб ўтди.
— Аввалдан синглимни турмушга бериб, кейин ўзим турмушга чиқаман деганман. 23 ёшда синглимга ота-она бўлиб турмушга бердим. Менимча, энди кун келиб ўзим фарзандларимга тўй қиладиган бўлсам, қийналмасам керак. Қариндошлар ҳам кулиб “қуда хола” дейишади. Чунки қизни қандай узатиш борасида тажрибам бор. Энди ўзим турмушга чиқиб, кейин укамни уйлантириш ниятим бор. Ҳозир укам институтда ўқияпти. Аммо турмушга чиқишдан аввал Тошкентдан уй олишни ва уни укамга қолдиришни ният қилганман, — дейди актриса Зарина Йўлдошева.
Изоҳ (0)