Беларусь Польша вертолёти яна чегарани бузганини даъво қилди. Варшава буни рад этмоқда

Беларусь Мудофаа вазирлиги 28-сентябр куни тушдан кейин Польша вертолёти Беларусь ҳаво ҳудудини бир неча бор бузганини даъво қилмоқда.

“Бугун (28-сентябр) соат 15:02 да Ҳарбий ҳаво кучлари ва Ҳаво мудофааси кучларининг радиолокацион аниқлаш ускуналари Польша самолётининг Беларусь чегарасига яқинлашаётганини аниқлади. Тахминан 15:20 да самолёт Беларусь Республикаси чегарасини кесиб ўтиб, бир ярим километргача ичкари масофани босиб ўтди”, — дейилади Мудофаа вазирлиги хабарида.

Уларнинг қўшимча қилишича, соат 16:22 да вертолёт яна давлат чегарасини бузиб, 300 метр ичкарига кирган.

“Маълумотлар объектив назорат маълумотлари билан тасдиқланди. Шу муносабат билан навбатчи авиация ҳавога кўтарилди”, — дейилади вазирлик хабарида.

Польша Қуролли кучлари оператив қўмондонлиги матбуот котиби Яцек Горишевскийнинг айтишича, Варшава Минскдан олинган маълумотни рад этади.

“Биз томондан ҳеч қандай ҳаво ҳудуди бузилиши кузатилмади. Буни радар тизимларимиздан тасдиқлатдик”, — деди у.

Беларусь Ташқи ишлар вазирлиги воқеа юзасидан Польшанинг Беларусдаги муваққат ишлар вакили Мартин Войцеховскийга кескин норозилик билдирилганини маълум қилди.

Сентябр ойи бошида Беларусь ҳукумати Польшани Гродно вилоятида Беларусь чегарасини бузганликда айблаганди. Польша Беларусь томонининг баёнотларини провокация деб атади.

Шу ойда Польша ҳам Беларусни чегарани бузишга уринишда айблади. Польша Мудофаа вазирлиги бир гуруҳ муҳожирлар чегарадаги панжараларни бузиб ташлагани акс этган видеони чоп этди. Маълум бўлишича, бу видео 2021 йилга оид бўлиб, аввал Польша ҳарбийлари бу кадрлардан фойдаланган.

Август ойида Польша “Вагнер” ёлланма аскарларининг Беларусга келиши ва ноқонуний муҳожирлар оқими фонида Беларусь билан чегарага қўшимча қўшинлар жойлаштира бошлади.