Farg‘ona viloyati Bag‘dod tumani hokimligida 14-noyabr kuni pedagogika kolleji zimmasiga yuklangan 2024-yilgi gazeta va jurnallar obuna rejasini bajara olmagan muassasa direktori tuman hokimining o‘rinbosari tomonidan kaltaklangani haqida xabar berilgan edi.
Bag‘dod tumani hokimi farmoyishi bilan 22-noyabr kuni tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar bo‘yicha o‘rinbosari Qahramon Murtazoqulovga nisbatan hayfsan chorasi qo‘llanildi.
Farmoyishga davlat fuqarolik xizmatchisining odob-axloq qoidalari, tuman prokuraturasining taqdimnomasi va tuman hokimligining odob-axloq komissiyasining yig‘ilish bayoni asos sifatida olingan. Lekin chora ko‘rishga aynan qanday holat asos bo‘lgani ochiqlanmagan.
Avvalroq Oliy taʼlim, fan va innovatsiyalar vazirligi holat yuzasidan bergan bayonotida vazirlik professional taʼlim tizimiga masʼul sifatida holatni tashvishli deb baholaydi va keskin qoralashini bildirgan.
Shuningdek, vazirlik gazeta va jurnallarga majburiy obuna tashkil etilishiga mutlaqo qarshi bo‘lib, bunday holatlarga qarshi kurash, oldini olish maqsadida oliy va professional taʼlim muassasalari, professor-o‘qituvchilar, o‘quvchi-talabalar hamda boshqa xodimlar o‘rtasida doimiy tushuntirish ishlari olib borilishini maʼlum qilgan.
Hozirda yuqoridagi holat yuzasidan tuman prokuraturasi tergovga qadar surishtiruv ishlarini olib bormoqda.
Izoh (0)