Қорақалпоғистон Республикаси ва Фарғона вилоятида қалбаки акциз маркали алкогол маҳсулотларини муомалага киритилишининг олди олинди, деб хабар беради Бош прокуратура ҳузуридаги департамент.
Қайд этилишича, департаментнинг Қўнғирот туман бўлими томонидан ДХХ ва ИИБ ходимлари билан ҳамкорликда тинтув-тергов ҳаракатлари ўтказилган. Натижада фуқаро Б.К. ўз уйида қўлбола усулда тайёрланган қалбаки акциз маркали 888 дона, Cobalt русумли автотранспорт воситасида эса Ўзбекистон акциз маркаси билан елимланмаган хорижда ишлаб чиқарилган 114 дона алкогол маҳсулотини ўтказиш мақсадида сақлаб келаётгани аниқланиб, ушбу маҳсулотлар ашёвий далил сифатида олинган.
Шу каби, департаментнинг Қўқон ва Фарғона шаҳар бўлимлари томонидан ўтказилган терговга қадар текширувларда “Ж.Ф.” ва “W.H.” МЧЖларга қарашли савдо дўконларида жами 625 дона қалбаки акциз маркали алкогол маҳсулотлари сотувга қўйилгани аниқланиб, ушбу маҳсулотлар ашёвий далил сифатида олинган.
Мазкур ҳолатлар юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) ва 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят ишлари қўзғатилиб, тергов ҳаракатлари ўтказилмоқда.
- Сурхондарёда июнь ойида ҳам истеъмолга яроқсиз ёғ маҳсулотлари муомалага киритилишининг олди олинганди.
- Хоразмда бўлса инсон соғлиғи учун хавфли спиртли ичимликларни тайёрлаб келган шахс фаолиятига чек қўйилгани,
- Наманганда 550 миллион сўмлик дори воситалари йўқ қилингани тўғрисида хабар берилганди.
Изоҳ (0)