Шавкат Мирзиёев 16 ноябрь куни Сурхондарё вилоятига ташриф буюриб, Ҳаким ат-Термизий мақбарасини зиёрат қилди.
Президент матбуот хизматининг хабар қилишича, Қуръон оятлари тиловат этилиб, Ўзбекистонга тинчлик, халққа фаровонлик тилаб дуо ўқилди.
“Уламолар билан суҳбатда бугун дунёда турли низо ва урушлар бўлаётгани, бегуноҳ инсонлар қони тўкилаётгани афсус билан қайд этилди. Бу юртимиздаги тинчлик-осойишталик қадрини янада теран англатиб, инсонда шукроналик руҳини уйғотади. Бу неъматлар аҳамиятини, Термизий каби боболаримиз илм-маърифатини ёшларга етказиш муҳимлиги таъкидланди”, — дейилади хабарда
Шу масалалар бўйича Термизда илмий конференция ўтказиш таклифи билдирилди.
Давлат раҳбари Сурхондарё вилоятига ҳудудлар иқтисодиёти, муҳим ижтимоий дастурлар ижроси билан танишиш мақсадида келди. Ташриф давомида иқтисодий йўналишда газни қайта ишлаш, гидроэнергетика, чарм саноати, қишлоқ хўжалиги, тадбиркорлик лойиҳалари кўздан кечирилади. Ижтимоий соҳаларда ичимлик суви таъминоти, маҳалла тизими, соғлиқни сақлаш, ёшлар масалаларига эътибор қаратилади.
Президент ушбу вилоятга бундан аввал март ойининг ўрталарида ташриф буюрганди. Ўшанда Шавкат Мирзиёев вилоятнинг Жарқўрғон туманидаги “Камола Камолбек Қуюн” фермер хўжалигида бўлган, Термиз шаҳрида халқ депутатлари Сурхондарё вилояти кенгаши сессияси қатнашган эди. Шунингдек, Бойсун—Денов йўналишидаги йўллар сифати бўйича одамлардан тушаётган эътирозларни инобатга олиб, ўзи автомобиль ҳайдаб кўрганди.
Изоҳ (0)