“Док-1 Макс” судида 33 минг доллар олди-бердисида воситачи бўлган судланувчига қўлланган қамоқ эҳтиёт чорасини бекор қилиш сўралди

Ўзбекистонда энг камида 65 нафар боланинг ўлимига сабабчи экани айтилаётган “Док-1 Макс” сиропи бўйича қўзғатилган жиноят ишини кўриб чиқаётган судда 33 минг доллар олди-бердисида иштирокчи бўлган судланувчига нисбатан қўлланилган қамоқ эҳтиёт чорасини бекор қилиш сўралди. Бу ҳақда “Дарё” журналисти хабар берди. 

Мазкур илтимоснома судланувчи Ж.Э.нинг адвокати Нормурод Собиров томонидан киритилди. Ва адвокатнинг бир неча ҳамкасблари томонидан қўллаб-қувватланди. Прокурор эса буни рад этишни сўради. Судлов ҳайъати илтимосномани рад этиш бўйича ажрим чиқарди. 

Жиноят иши бўйича Давлат хавфсизлик хизматининг хати бизда расмий кирим бўлган. Бу ҳақда сўров бериб, нима бўлди экан деб масалани кўтаришни ўйладим. Аммо ҳозирча тинч турган ҳолатни қўзғаб қўяманми деган фикр ҳам ўтди. Илтимоснома киритиб, яхшилик қилиш ўрнига ёмонлик қилиб қўймайлик деган ўй бўлди. Судланувчи оғир ва ўта оғир жиноятларни содир этганликда айбланяпти. Шунинг учун биз судланувчи Ж.Э.га қўлланилган қамоқ эҳтиёт чорасини ўзгартиришга вақтли деган фикрга келдик. Мазкур суд ишимиз якунига келиб, бу ҳолат бўйича жиноят иши қўзғатилган ёки қўзғатилмагани аниқланса, бирор бир тўхтамга келамиз, — деди судья Мусо Юсупов илтимосномани рад этганига изоҳ берар экан. 

Эслатиб ўтамиз, “Док-1 Макс” ишини кўриб чиқаётган суднинг 2023 йил 22 сентябрь куни давом этган мажлисида 33 минг доллар олди-бердисида воситачилик қилгани айтилган айбланувчига қамоққа олиш тарзидаги эҳтиёт чораси қўлланиб, судланувчи суд залидан қамоққа олинганди. Судья Мусо Юсупов буни жамоатчилик ва адвокатларга номаълум бўлган мурожаатчининг ДХХ раисига шикоят қилиб, Ж.Э.нинг судда унинг фойдасига ҳал бўладиган кўрсатма беришга ундагани ёзилган аризаси сабаб бўлганини айтганди.

33 минг порани ҳиндистонлик тадбиркордан олган судланувчи Ж.Э. пулларни “Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУК рўйхатдан ўтказиш бўлими бошлиғи Ш.Ш.га етказганини билдирганди. Судланувчи Ш.Ш. эса бу пулларни олмаганини, кўрмаганини айтди. Суднинг 15 ноябрь куни бўлиб ўтган мажлисида Фармасевтика тармоғини ривожлантириш агентлигининг собиқ раҳбари, “Док-1 Макс” иши бўйича судланувчи мақомига эга бўлиб турган С.К. 33 минг доллар унга ўринбосар сифатида, кейинчалик агентлик раҳбари сифатида ишлаган Улуғбек Эгамовга етиб борганини айтди. Ва Улуғбек Эгамовга нисбатан ҳам жиноий иш очилишини сўради.