Fransiyaning Orano kompaniyasi O‘zbekistonda uran qazib olish va qayta ishlashga 500 million dollargacha sarmoya kiritadi. Bu haqda tog‘-kon sanoati va geologiya vaziri Bobur Islomov Samarqandda o‘tgan Verona Yevroosiyo iqtisodiy forumida Spot’ga ma’lum qildi.
Vazirning qayd etishicha, O‘zbekistonda Orano bilan strategik sheriklik to‘g‘risida shartnoma imzolangan. Fransiya kompaniyasi hozirda geologiya-qidiruv ishlarini olib bormoqda, 2023-yil oxirigacha loyihaning dastlabki texnik-iqtisodiy asoslari ishlab chiqiladi.
“Strategik kelishuvda [Navoiy viloyatining Tomdi tumanidagi] ikkita qo‘shimcha maydonda bo‘lishi ko‘rsatilgan, ularda [Orano] geologik qidiruv ishlarini olib boradi. Barchasi, albatta, texnik-iqtisodiy asoslash hal qilinadi, hozircha hammasi ijobiy ketmoqda. Umumiy sarmoyaning jami hajmi shartnomada 500 million dollargacha qilib belgilangan”, — degan Bobur Islomov.
Uning bildirishicha, uran ishlab chiqarishning mavjud hajmlari allaqachon savdo bozorlarini topgan. Yadro yoqilg‘isini ishlab chiqarish hajmi oshishiga bilan O‘zbekiston narxlar konyunkturasidan kelib chiqib eksport qilish to‘g‘risida qaror qabul qiladi.
“Uran bo‘yicha kim bilan ishlashishimizdan qat’iy nazar, biz jahon narxlariga asoslanganmiz. Agar narx ko‘tarilsa, bizda hamma narsa formulalarga bog‘liq va yetkazib berish narximiz ham ko‘tariladi”, — deydi Bobur Islomov.
Shuningdek, 2023-yilda barcha yo‘nalishlarda uran eksporti oshganini ma’lum qilib, yetkazib berishni diversifikatsiya qilish muhimligini aytdi.
Fransiya prezidenti Emmanuel Makronning mamlakatga tashrifi doirasida Orano O‘zbekistonda geologiya-qidiruv ishlari va uran qazib chiqarish sohasida yangi loyihalarni amalga oshirishi ma’lum bo‘lgandi. Undan avvalroq Bloomberg Fransiya prezidenti O‘zbekiston va Qozog‘istonga tashrifidan maqsad uran yetkazib berishni ko‘paytirish masalasini muhokama qilish ekanligini yozgandi.
Izoh (0)