Ғазо сектори ва Исроил ўртасида жанговар ҳаракатлар бошланганидан кейин мусулмонларга қарши можаролар етти карра ошиб кетгани боис Буюк Британия бош вазири Риши Сунакка исломофобияни бостириш таклиф этилди, деб хабар беради Daily Mail.
Қайд этилишича, 7 октябрдан 29 октябрга қадар 515 та шу каби ҳолат қайд этилган. 2022 йилнинг ушбу даврида бу кўрсаткич 73 тани ташкил этган.
Яқинда шакллантирилган Исломофобияга қарши курашиш ишчи гуруҳи (AIWG) Британия бош вазирини мусулмонларга қарши нафратга чек қўйишга чақирди. AIWG асосчиси Аниса Маҳмуднинг айтишича, Ғазодаги урушдан кейин мусулмонларга қарши тўқнашувлар сонининг кескин ошиб кетаётгани сабаб ҳозирда бош вазир ушбу масала билан шуғулланишининг айни вақти.
“Мана нима учун уни ишчи гуруҳ билан учрашишга чақиряпмиз, биз исломофобия муаммоси ҳал этилишини хоҳлаймиз”, — дейди у. Оксфорддаги масжидга уюштирилган ҳужум (автотураргоҳга ичида бензини бор идиш ташлаб кетилган) ҳам мазкур вазият жиддийлигига мисол қилиб келтирилган.
Қайд этилган 515 та ҳолатнинг 247 таси реал ҳаётда содир бўлган, жумладан, 24 та ҳужум амалга оширилган. Қолганларини эса онлайн-нафратлар ва таҳдидлар ташкил этади. Мусулмонларга қарши можароларни қайд этиш билан шуғулланувчи Теll МАМА миллий лойиҳасига кўра, Лондоннинг ўзида бу каби ҳолатлар икки баробарга ошган.
Исроил ва ҲАМАС ўртасида бошланган урушнинг эртаси куни Британия ҳукумати 24 соат ичида ҳамкорлар билан Исроилни қўллаб-қувватлаш чораларини келишиб олганди. “Бугунги кунда содир этилган ваҳшийликларнинг қиёфаси тобора ойдинлашиб бормоқда ва биз Исроилни сўнгсиз қўллаб-қувватлаймиз. ҲАМАС томонидан амалга оширилган ҳужум — қўрқоқлик ва жирканчлик”, — деганди Риши Сунак.
Изоҳ (0)