G‘azo sektori va Isroil o‘rtasida jangovar harakatlar boshlanganidan keyin musulmonlarga qarshi mojarolar yetti karra oshib ketgani bois Buyuk Britaniya bosh vaziri Rishi Sunakka islomofobiyani bostirish taklif etildi, deb xabar beradi Daily Mail.
Qayd etilishicha, 7-oktyabrdan 29-oktyabrga qadar 515 ta shu kabi holat qayd etilgan. 2022-yilning ushbu davrida bu ko‘rsatkich 73 tani tashkil etgan.
Yaqinda shakllantirilgan Islomofobiyaga qarshi kurashish ishchi guruhi (AIWG) Britaniya bosh vazirini musulmonlarga qarshi nafratga chek qo‘yishga chaqirdi. AIWG asoschisi Anisa Mahmudning aytishicha, G‘azodagi urushdan keyin musulmonlarga qarshi to‘qnashuvlar sonining keskin oshib ketayotgani sabab hozirda bosh vazir ushbu masala bilan shug‘ullanishining ayni vaqti.
“Mana nima uchun uni ishchi guruh bilan uchrashishga chaqiryapmiz, biz islomofobiya muammosi hal etilishini xohlaymiz”, — deydi u. Oksforddagi masjidga uyushtirilgan hujum (avtoturargohga ichida benzini bor idish tashlab ketilgan) ham mazkur vaziyat jiddiyligiga misol qilib keltirilgan.
Qayd etilgan 515 ta holatning 247 tasi real hayotda sodir bo‘lgan, jumladan, 24 ta hujum amalga oshirilgan. Qolganlarini esa onlayn-nafratlar va tahdidlar tashkil etadi. Musulmonlarga qarshi mojarolarni qayd etish bilan shug‘ullanuvchi Tell MAMA milliy loyihasiga ko‘ra, Londonning o‘zida bu kabi holatlar ikki barobarga oshgan.
Isroil va HAMAS o‘rtasida boshlangan urushning ertasi kuni Britaniya hukumati 24 soat ichida hamkorlar bilan Isroilni qo‘llab-quvvatlash choralarini kelishib olgandi. “Bugungi kunda sodir etilgan vahshiyliklarning qiyofasi tobora oydinlashib bormoqda va biz Isroilni so‘ngsiz qo‘llab-quvvatlaymiz. HAMAS tomonidan amalga oshirilgan hujum — qo‘rqoqlik va jirkanchlik”, — degandi Rishi Sunak.
Izoh (0)