Иордания Исроил армиясининг Ғазо секторидаги жанговар ҳаракатлари кенгайганига жавобан Исроилдаги элчисини зудлик билан чақириб олишга қарор қилди, деб хабар бермоқда Аl-Wakееl мамлакат Ташқи ишлар вазирлиги баёнотига таяниб.
Шу билан бирга, Иордания ташқи ишлар вазири Айман Ал-Сафадий Исроил ТИВни аввалроқ қиролликни тарк этган Исроил элчисини қайтиб қабул қилмаслик тўғрисида огоҳлантирган.
“Ушбу қарор Иордания томонидан Исроилнинг Ғазо секторида бегуноҳ фуқароларнинг ўлимига ва мисли кўрилмаган жиддий гуманитар инқирозга олиб келган шиддатли урушни қоралаши ва рад этишининг қатъий ифодасидир”, — дейилади Иордания Ташқи ишлар вазирлиги баёнотида.
Иордания томонининг таъкидлашича, элчилар Исроил Ғазо секторидаги ҳарбий ҳаракатларни тўхтатгандан кейин қайтиши мумкин. Ал-Сафадий Иордания Ғазодаги урушни тугатиш учун ҳаракатни давом эттиришини қайд этди. У Фаластин пойтахти Қуддусда 1967 йилда тузилган шартнома асосида минтақада тинчликка эришиш зарурлиги ҳақида гапирди.
Аввалроқ Боливия ҳукумати Исроилнинг Ғазо секторидаги операцияси туфайли Исроил билан дипломатик муносабатларни узганини маълум қилганди. Чили ва Колумбия маслаҳатлашувлар учун Исроилдан ўз элчиларини чақириб олди. Учала давлат ҳам сулҳ тузишга чақирди. Исроил Ташқи ишлар вазирлиги Боливиянинг қарорини “терроризм ва Эрон режимига таслим бўлиш” деб атади.
Изоҳ (0)