Америкалик актёр Дуэйн Жонсон “Форсаж” фильмининг янги қисмида партнёри Вин Дизелсиз суратга тушади. Актёр Instagram ижтимоий тармоғидаги аккаунтида собиқ агент Люк Хоббс (франшизанинг бош қаҳрамонларидан бири) ролига қайтишини маълум қилди.
Дуэйн бу ҳақда гапирган видеосини саҳифасига жойлади ва кейинги қисм Хоббс ҳақидаги фильм бўлишини таъкидлади.
“Ўтган ёзда Вин Дизел ва мен барча келишмовчиликларни орқага ташладик ва биз ҳар доим франшиза, қаҳрамонлар ва бизни севадиган мухлислар ҳақида қайғурамиз”, — дейди актёр.
Universal Pictures ҳали аниқ номланмаган фильмнинг суратга олинишини эълон қилди. Сценарий “Форсаж” фильмининг узоқ йиллик муаллифи Крис Морган томонидан ёзилади. Сюжет тафсилотлари ҳали ошкор этилмаган, бироқ тафсилотлар билан таниш бўлган манбаларда янги фильм яқинда чиққан сўнгги “Форсаж-10” фильмидаги воқеалар ва 2025 йилда чиқариладиган Fast Х: Part 2 картинасининг иккинчи қисми билан боғловчи бўлиб хизмат қилиши айтилмоқда.
Жонсон лойиҳани Вин Дизел билан биргаликда ишлаб чиқаради, бироқ унинг иштироки шу билан чекланади. Қайд этилишича, унинг қаҳрамони Доминик Торетто фильмда суратга тушмайди, бироқ аввалги қисмлардаги бошқа персонажлар лойиҳага қайтади.
Вин Дизел ва Дуэйн Жонсон ўртасидаги “Форсаж-8” фильмини суратга олиш пайтида юзага келган можаро жуда жиддий тус олди ва Дуэйн Жонсон Дизелни манипулятор деб атаган ҳолда лойиҳага қайтиш имкониятини қатъиян рад этди. Ҳамкасбларнинг қандай қилиб ярашгани эса номаълум бўлиб қолмоқда.
“Форсаж-10” фильми 2023 йилнинг 19 май санасидан бошлаб бутун дунё кинотеатрларида намойиш этилмоқда ва лойиҳа шу кунгача 522 миллион доллардан ортиқ даромад келтирди. Узоқ давом этган франшиза илк бор 2001 йилда намойиш этилган. Лойиҳа кўчадаги пойгачилар ва уларнинг дўстлиги ҳақидаги фильм сифатида бошланган, бироқ кейинчалик сюжет га танкларни йўқ қилиш, самолётларни ўғирлаш ва осмонўпар бинолардан машинада сакраш акс этган саҳналар қўшилган.
“Форсаж-10” фильмида Жейсон Момоа (“Тахтлар ўйини”, “Аквамен” лойиҳаларида суратга тушган) антагонист Данте ролини ўйнаган. Сюжет га кўра, Данте бешинчи “Форсаж” фильмида ўлдирилган наркобарон Эрнан Рейснинг ўғли бўлиб, у 12 йилдан бери қасос олиш режасини ўйлаб юради. Фильмда Вин Дизел ва Жейсон Момоадан ташқари, АҚШ Академия мукофоти совриндорлари Шарлиз Терон, Хелен Миррен ва Рита Морено рол ўйнаган.
Изоҳ (0)