Мюнхен фожиасидан тирик чиққан, “Манчестер Юнайтед” ва Англия футболи тимсолига айланган сер Бобби Чарлтон ҳақида

Англиялик собиқ футболчи, афсона сер Бобби Чарлтон 21 октябрь куни 86 ёшида вафот этди.

Чарлтон “Манчестер Юнайтед” сафида 758 та ўйин ўтказган, терма жамоа либосида эса 106 та ўйинда майдонга тушган. Сер Бобби футбол тарихидаги энг қайғули трагедия бўлмиш Мюнхен фожиасида омон қолган инсон эди. 

***

Роберт Чарлтон футболчилар оиласида таваллуд топган: унинг тўрт нафар амакиси футболчи бўлган, катта акаси Жек “Лидс” жамоаси афсонаси бўлган. Улар иккаласи биргаликда ЖЧ—1966 да иштирок этган ва ғалаба қозонган.

Бобби 15 ёшида “Манчестер Юнайтед”га қабул қилинади. Чарлтон Метт Басби ва Жимми Mёрфи томонидан бошқарилган машҳур “Басби болалари” футболчиларидан бирига айланди. 

Бобби 1956 йил октябрь ойида “Манчестер Юнайтед” асосий таркибида майдонга тушди. 19 ёшли иқтидор эгаси илк мавсумидаёқ Англия чемпионлигини қўлга киритди ва Кубок финалига қадар етиб борди. 

1958 йил февралида эса Чарлтон қайта дунёга келгандек бўлди: у Мюнхендаги авиаҳалокатдан омон қолди. Бортдаги 44 кишидан 23 нафари ҳаётдан кўз юмди. Инглиз футболи тарихдаги энг иқтидорли ёш жамоалардан бирини бой берди. 

Ҳалокат чоғида Бобби самолёт кабинасидан ташқарига улоқтирилган. Манкунианликлар дарвозабони Гарри Грегг уни топиб олганда, аллақачон ўлган деб ўйлаганди. Аммо Роберт ҳаммадан тезроқ тузалди ва ҳалокатдан бир ҳафта ўтиб, шифохонадан чиқди.

У тузалаётган пайтда, маҳаллий ёшлар билан тўп сурарди — ушбу машҳур фотосурат ўша вақтда олинган.

Фожиадан омон қолган Метт Басби жамоани қайта қуришни бошлади, 20 ёшли Чарлтон ўша жамоада муҳим рол ўйнаган. 

1963 йилда Роберт учинчи уринишда Англия Кубогида ғалаба қозонди. Худди шу соврин унинг фаолиятида ягона эди, лекин мамлакат чемпионлигини уч марта нишонлаган.

1966 йилда Чарлтон қаҳрамонга айланди: Англия Жаҳон Чемпионатида ғолиб бўлди. Роберт жамоа ҳужумида дирижор вазифасини бажарарди, унинг афсонавий Эйсебиоси бор Португалияга урган икки голи инглизларни финалга олиб чиққан. 

Эндиликда англияликларнинг ушбу таркибидан фақатгина Жефф Херст қолди. Айнан Жефф финалда афсонавий ҳет-трик қайд этганди. 

Ўша йилнинг ўзида Чарлтон бир қанча индивидуал соврин, жумладан “Олтин тўп”ни ҳам қўлга киритган. 2023 йил июль ойида Луис Суареснинг вафотидан сўнг сер Бобби энг ёши катта “Олтин тўп” эгаси бўлиб турганди. 

Энди эса бу мақом 83 ёшли Денис Лоуга тегишли.

Мюнхен фожиасидан 10 йил ўтиб, 1968 йилда “Манчестер Юнайтед” Европа Чемпионлар Кубогида зафар қучди. Бобби финалда дубль қайд этиб, ушбу совринни кўтарган илк англиялик сардорга айланди.

Орадан 2 йил ўтиб, 32 ёшли Чарлтон акаси Жек билан биргаликда терма жамоадаги фаолиятини якунлади. ЖЧ—1970 чорак финалидаги муваффақиятсизликдан сўнг улар шу қарорга келган. 

Уч йилдан сўнг Чарлтон “Манчестер Юнайтед”дан ҳам кетди. У манкунианликларнинг рекордчиси эди — энг кўп ўйин ўтказган (758) ва энг кўп гол урган (249) футболчи. Биринчи рекорд 2008 йилги Чемпионлар Лигаси финалида Райан Гиггз томонидан бузилди, иккинчиси эса 2017 йилда Уэйн Руни томонидан забт этилди. 

Робертнинг акаси Жек билан муносабатлари унчалик яхши бўлмаган.

2007 йилда Бобби Чарлтон рафиқаси Норма ва уларнинг онаси Сисси (1996 йил 84 ёшида вафот этган) ўртасида юзага келган келишмовчилик туфайли акаси билан ҳеч қандай алоқада бўлмаганини тан олган.

Бироқ, Алекс Фергюсон билан бошиданоқ муносабатлар илиқ бўлган. “Манчестер Юнайтед” директорлар кенгаши аъзоси бўлган Чарлтон мураббийни тўлиқ қўллаб-қувватлаган.   

“У бошиданоқ мени “Манчестер Юнайтед”га мураббий сифатида тавсия қилди ва мен уни доимо мен томонда бўлишини ҳис қилдим. Жамоа қийин даврларни бошдан кечираётганда Бобби менга ҳаммаси яхши бўлишини, барчасини тўғри қилаётганим ва шу йўналишда давом этишим лозимлигини айтганди”, — дейди сер Алекс Фергюсон.

Чарлтон — Девид Бекҳэмнинг фаолиятида муҳим ўрин тутган шахс ҳисобланади. Девиднинг отаси афсонанинг энг катта мухлисларидан бири эди, шунинг учун у ўғлига Бобби шарафига исм қўйган (Бекҳэмнинг иккинчи исми — Роберт). 

Аммо Девид Чарлтон билан янада яқинроқ алоқага эга: 

“Мен барчаси учун сер Боббидан қарздорман, агар у бўлмаганидан орзуимдаги клубда ҳеч қачон ўйнай олмасдим. Бобби Чарлтоннинг футбол мактабига боргандим ва мусобақада ғолиб чиққандим. Шундан сўнг у “Манчестер Юнайтед” билан боғланиб, менга эътибор қаратишларини сўраган. Шу тариқа менинг Манчестердаги саргузаштларим бошланган”. 

1994 йилда Чарлтон рицар унвонига сазовор бўлди.

Узоқ йиллар давомида мухлислар Чарлтонни севимли рафиқаси Норма ва Фергюсон билан биргаликда кўришга одатланиб қолганди. 

Энди “Олд Траффорд”нинг мана бу ложаси ҳувиллаб қоладиган бўлди. 

2020 йил ноябрь ойида Чарлтонга деменция ташхиси қўйилди. 

Ва бу унинг 85 ёшли акаси Жек вафотидан тўрт ой ўтгач содир бўлганди. 

Ютуқлари

Жамоавий ютуқлар

“Манчестер Юнайтед” (9 та соврин)

• Англия чемпиони (3): 1956/57, 1964/65, 1966/67
• Англия Кубоги: 1963
• Европа Чемпионлар Кубоги: 1968
• Англия Суперкубоги (4): 1956, 1957, 1965, 1967

Англия терма жамоаси (12)

• Жаҳон Чемпионати: 1966
• Европа чемпионати бронза медали соҳиби: 1968
• Британия уй чемпионати ғолиби (10): 1958, 1959, 1960, 1961, 1964, 1965, 1966, 1968, 1969, 1970

Шахсий совринлар

• “Олтин тўп”: 1966
• Футбол журналистлари ассоциациясига кўра йил футболчиси: 1966
• Жаҳон Чемпионати “Олтин тўп” соҳиби: 1966
• Ярмаркалар Кубоги тўпурари: 1965
• Футбол лигасининг энг яхши 100 афсонаси рўйхатига киритилган: 1998
• Англия футболи шарафлар залига киритилган: 2002
• “ФИФА 100” рўйхатига киритилган: 2002
• Футбол олдидаги хизматлари учун BBC соврини соҳиби: 2008
• Футбол олдидаги хизматлари учун УЕФА президенти соврини соҳиби: 2009
• Жаҳон Чемпионати рамзий терма жамоасига киритилган (2): 1966, 1970
• World Sоccеr версиясига кўра ХХ асрнинг энг яхши футболчилар рўйхатига киритилган.