Тошкент шаҳрида битта МЧЖ қарийб 4 миллиард дўмлик табиий газдан ноқонуний фойдалангани аниқланди, деб хабар беради Энергетик вазирлиги матбуот хизмати.
Қайд этилишича, “Ўзэнергоинспекция” томонидан Бош прокуратура ва “Ҳудудгазтаъминот” АЖ ходимлари билан ҳамкорликда Тошкент шаҳрида ўтказилган назорат тадбирларида Шайхонтоҳур туманида жойлашган “Р.Т.” МЧЖ табиий газдан ноқонуний фойдаланиб келаётгани аниқланган.
Хусусан, ушбу МЧЖга қарашли корхонанинг иккита буғ қозони газ тармоғига ўзбошимчалик билан уланганлиги маълум бўлган. Мазкур ноқонуний ҳолат натижасида давлат манфаатларига етказилган зарар миқдори 3 миллиард 838 миллион сўмни (5 миллион 816 минг 592 метр куб) ташкил этган.
Маълумот учун, ушбу ҳажмдаги табиий газ 29 минг 82 та хонадоннинг бир ойлик истеъмолига тенг.
Шу билан бирга, истеъмолчининг бугунги кун ҳолатида электр энергиясидан 3 миллиард 59 миллион сўм қарздорлиги мавжудлиги сабабли электр тармоғидан ажратилган. Аниқланган ҳолат юзасидан расмийлаштирилган ҳужжатлар белгиланган тартибда ҳуқуқни муҳофаза этувчи органларга тақдим қилинган.
Аввалроқ Жиззах шаҳридаги МЧЖ 3 млрд 840 млн сўм ёки 19 200 та хонадоннинг бир ойлик истеъмолига тенг миқдордаги табиий газдан ноқонуний фойдалангани аниқланганди. Шунингдек, Тошкентда салкам 530 млн сўмлик газдан ноқонуний фойдаланилгани, Ўзбекистонда бир ойда электр ва газдан ноқонуний фойдаланиш оқибатида тизимга қанча зарар етгани тўғрисида хабар берилган эди.
Изоҳ (0)