Хитой ҳукумати дезинформация, цензура ва диссидентларни (ҳукуматга қарши фикрловчилар) таъқиб қилиш учун “мисли кўрилмаган ресурслар”га сармоя қилмоқда. Бу ҳақда АҚШ давлат департаменти баёнотида айтилади.
Давлат департаментининг таъкидлашича, ХХР хорижий аудитория орасида ўз фойдасига ишлайдиган нарративлар яратишга уринмоқда.
Ҳисоботда айтилишича, “Хитойнинг ўз кучига ишончи ортиб бормоқда ва улар ахборотни манипуляция қилиш орқали манфаатларини илгари суриш мумкинлигига ишонади”.
Идора ҳисоботига кўра, Пекин Хитойнинг сиёсий раҳбариятига нисбатан танқидларни бостирувчи нохолис баёнотлар тарқатиш учун миллиардлаб доллар сарфламоқда.
Хусусан, давлат департаментининг таъкидлашича, Хитой давлат оммавий ахборот воситалари Россиянинг Украинага бостириб киришидан сўнг кремлпараст ёки НАТОга қарши пропогандани қўллаб-қувватлаган ва кучайтирган.
“Масалан, улар Москванинг Украинада АҚШ томонидан молиялаштирилган махфий биологик қурол ишлаб чиқариш заводлари мавжудлиги ҳақидаги баёнотларини тарқатган. Ўз навбатида, Россия Тайван ва ХХРнинг бошқа манфаатлари билан боғлиқ пропагандани тарғиб қилмоқда”, — дейилади хабарда.
Ҳисоботда, шунингдек, Хитой ҳукумати мамлакатдаги режим танқидчиларига қарши қўрқитиш тактикасини қўллагани қайд этилган.
Шу билан бирга, ҳисоботда айтилишича, Пекин маҳаллий ОАВ ва фуқаролик жамиятининг қаршилиги туфайли демократик мамлакатларда манипулятив ахборотни тарғиб қилишда жиддий муваффақиятсизликларга дуч келган.
Изоҳ (0)