Ханчжоу—2022. Ўзбекистонлик қиличбозлардан тарихий ғалаба, гандболчилар гуруҳдаги сўнгги ўйинида зафар қучди, Лазизбек Муллажонов мусобақани тарк этди

Ханчжоу—2022 ХIX ёзги Осиё ўйинлари 29 сентябрь, жума куни давом эттирилди.

Ўзбекистонлик спортчилар 29 сентябрь кунги баҳсларда қиличбозлик, енгил атлетика, сузиш, велотрек, ўқ отиш каби спорт турларида медаллар учун курашди. 

Қиличбозликнинг сабля йўналиши бўйича Ўзбекистон аёллар терма жамоаси шиддатли руҳда кечган финал жангида япониялик рақибларини мағлубиятга учратиб, Осиё ўйинлари чемпионига айланди. Бу қиличбозлик спортида Осиё ўйинларида қўлга киритилган биринчи олтин медал.

Бокс бўйича -92 кг вазн тоифасида Ўзбекистон терма жамоаси шарафини ҳимоя қилган Лазизбек Муллажонов мусобақани тарк этди. Чорак финалда хитойлик Суэчжен Ҳанга қарши рингга кўтарилган Лазизбек 1:4 ҳисобида мағлубиятга учради.

-80 кг вазн тоифасида иштирок этган Тўрабек Ҳабибуллаев Осиё ўйинларидаги иккинчи ғалабасини қўлга киритди. Тўрабек Саудия Арабистони вакили Муҳаммад Алсубҳи билан жангда катта устунлик қилди ва техник нокаут эвазига ғалаба қозонди.

Ситора Турдибекова Осиё ўйинларидаги иштирокини ғалаба билан бошлади. -57 кг вазн тоифасида қатнашаётган бокс бўйича Ўзбекистон терма жамоаси аъзоси покистонлик Фотима Заҳрони катта устунлик доғда қолдириб, кейинги босқичга йўл олди.

Гандбол бўйича Ўзбекистон аёллар терма жамоаси Осиё ўйинларидаги иштирокини ғалаба билан якунлади. Гуруҳ босқичининг сўнгги турида Таиландга қарши баҳс олиб борган қизлар 40:28 ҳисобида зафар қучди. Афсуски, бу ғалаба уларга плей-офф босқичига чиқиш учун етарли бўлмади.

Бугундан енгил атлетика баҳслари бошланди. Ўзбекистон терма жамоаси аъзоларидан биринчи бўлиб Лайло Аллаберганова стартга чиқди. 400 метрга югуриш дастурида иштирок этган Аллаберганова 55.01 сония натижа билан финалга йўл олди.