Butun dunyoda odamlar sog‘lig‘i qanchalik zaif ekanligiga amin bo‘la boshlagan va bunga eʼtibor berib, o‘z salomatligi haqida qayg‘ura boshlagan. Bu haqda 20-sentabr kuni Milliy matbuot markazida bo‘lib o‘tgan O‘zbekistonda STADA Health Report 2023 tadqiqotining natijalariga bag‘ishlangan matbuot anjumanida maʼlum qilindi, deya xabar bermoqda “Daryo” muxbiri.
Taʼkidlanishicha, so‘rovnomada qatnashgan O‘zbekiston aholisining 24 foizi shifokorlarga tez-tez tashrif buyurishini, 22 foizi esa ko‘proq profilaktik tibbiy ko‘rikdan o‘tganini aytgan.
“Ishtirokchilarning 21 foizi esa sog‘lom oziq-ovqatlar isteʼmol qila boshlaganini aytgan.
O‘zbekiston aholisining 26 foizi dori-darmonlarga, 10 foizi yangi oziq-ovqat mahsulotlariga, 8 foizi sog‘lomlashtirish muolajalariga sarflanadigan xarajatlarni qisqartirgan”, — deyiladi tadqiqotda.
Maʼlumotlarga ko‘ra, vitaminlarni qabul qilish respondentlarning 14 foizi tomonidan qayd etilgan. Respondentlarning 12 foizi ko‘proq dori sotib ola boshlaganini taʼkidlagan. Shuningdek, 14 foizi sport va salomatlik dasturlariga ko‘proq vaqt ajratgan.
Taqqoslaydigan bo‘lsak, Qozog‘istonda vitaminlarni qabul qilish ro‘yxatning boshida turadi: respondentlarning 37 foizi so‘nggi 12 oy ichida vitamin qabul qilish miqdorini oshirgan. Har to‘rtinchi qozog‘istonlik (26 foiz) sog‘lom ovqatlanishni boshlaganini qayd etgan.
Ma’lumot uchun, STADA sog‘liqni saqlash masalalari bo‘yicha Human8 tadqiqot kompaniyasini jalb etgan holda xalqaro jamoatchilik fikri so‘rovini o‘tkazgan. Unga O‘zbekistonda “Ijtimoiy fikr” markazi hamkorlik qilgan.
Markaz telefon yordamida o‘tkazilgan so‘rovnoma orqali maʼlumotlar yig‘gan. Har bir mamlakatda 2000 ga yaqin odam so‘rovnomada (18 yoshdan 99 yosh oralig‘ida) 32 ming 13 nafar respondent tadqiqotda ishtirok etgan.
Mavzuga doir:
Izoh (0)