Бухоро вилоятида аёлнинг фотосуратларига махсус дастур ёрдамида қайта ишлов бериб, тарқатиш билан қўрқитиб, пул талаб қилган шахс қўлга олинди. Бу ҳақда Киберхавфсизлик маркази хабар берди.
Қайд этилишича, Когон туманида яшовчи 35 ёшли (аёл) К.З. ариза билан мурожаат қилиб, Telegram мессенжерида бир шахс унинг турли фотосуратлари ва беҳаё тасвирларини ижтимоий тармоқ орқали тарқатиб юбориш билан қўрқитиб, тарқатмаслик эвазига пул талаб қилаётганини маълум қилган.
Киберхавфсизлик бўлинмалари томонидан ўтказилган тезкор-қидирув тадбирлари натижасида мазкур жиноятни Когон туманида яшовчи 19 ёшли талаба Т.Б. содир этгани аниқланган.
Гумонланувчи сифатида тергов органларига жалб этилган Т.Б. фуқаро К.З.га Telegram орқали ёзиб, унинг профилидаги фотосуратларига махсус дастур ёрдамида қайта ишлов бериб, яланғоч ҳолдаги беҳаё фотосуратлари борлигини айтган. У мазкур беҳаё фотосуратларни ижтимоий тармоқларга тарқатиб, шарманда қилиш билан уни қўрқитиб, тарқатиб юбормаслик эвазига ундан 200 доллар миқдорида пул талаб қилган.
Товламачи автомобилларга ёнилғи қуйиш шохобчаси яқинидаги бекат олдида 2,5 миллион сўм пулни К.З.дан олган вақтида далилий ашёлар билан ушланган.
Мазкур ҳолат юзасидан Жиноят кодексининг 165-моддаси (товламачилик) 1-қисми билан жиноят иши қўзғатилиб, Т.Б.нинг содир этилиб, фош этилмай қолган бошқа шу турдаги жиноятларга алоқадорлиги юзасидан тезкор-суриштирув ишлари олиб борилмоқда.
Ўзгаларнинг шахсий маълумотларини тарқатиш орқали пул ундириш ҳолатлари
- Июль охирларида Бухоро шаҳрида эркак билан ишқий муносабатда бўлиб, уни турмуш ўртоғига ошкор қилмаслик эвазига телефон талаб қилган қиз қўлга олинганди.
- Май ойида Тошкентда аёлнинг фото-видеоларини эри ва қайнотасига кўрсатишини айтиб, ундан пул талаб қилган эркак ушлангани,
- Тошкент вилоятида 19 ёшли қизнинг суратларини тарқатиш билан таҳдид қилган йигит қўлга тушгани тўғрисида хабар берилганди.
Изоҳ (0)