Тошкент шаҳри ва Тошкент вилоятида тўртта истеъмолчи 500 миллион сўмдан ортиқ электр энергияси ва табиий газдан ноқонуний фойдалангани аниқланди. Бу ҳақда Энергетика вазирлиги матбуот хизмати хабар берди.
Қайд этилишича, 15 сентябрь куни “Ўзэнергоинспекция” томонидан ҳуқуқни муҳофаза қилувчи органлар ва таъминотчи корхоналар билан ҳамкорликда Тошкент шаҳри ҳамда вилоятида ўтказилган назорат тадбирларида электр энергияси ва табиий газдан ноқонуний фойдаланиш ҳолатлари аниқланган.
Жумладан:
- Юқори Чирчиқ тумани, “Бирлик” МФЙ, Қипчоқ кўчасида жойлашган “М.О.К” номли умумий овқатланиш шохобчаси табиий газдан ноқонуний равишда фойдаланиб, давлат манфаатларига 206,4 миллион сўм (206 415 метр куб);
- Нурафшон шаҳрида жойлашган “Ободонлаштириш” бошқармасига қарашли фаввора электр тармоғига ноқонуний равишда уланиб, давлат манфаатларига 171,7 миллион сўм (171 720 кВт/соат);
- Миробод туманида жойлашган банк муассасаси электр энергиясидан ноқонуний равишда фойдаланиб, давлат манфаатларига 76,8 миллион сўм (170 800 кВт/соат);
- Бекобод шаҳри, 12-даҳа, Ойбек кўчасида жойлашган “О.К.Ш” МЧЖга қарашли тўйхона электр тармоғига ноқонуний равишда уланиб, давлат манфаатларига 46,6 миллион сўм (103 564,8 кВт/соат).
Ҳозирги вақтда аниқланган ҳолатлар юзасидан ҳуқуқни муҳофаза қилувчи органлар томонидан ўрнатилган тартибда суриштирув ишлари олиб борилмоқда.
Ўзбекистонда 2023 йилнинг 6 ойида электр энергиясидан ноқонуний фойдаланиш туфайли 78,5 миллиард сўм, табиий газдан ноқонуний фойдаланиш сабабли эса 231 миллиард 866 миллион сўм зарар кўрилган. Бундан олдин Бухоро шаҳрида фаолият юритиб келаётган корхона электр ҳисоблагичга ташқи таъсир кўрсатиши натижасида тизимга 2 миллиард сўмлик зарар етказилгани тўғрисида хабар берилганди. Мамлакатда август ойида электр энергияси ва табиий газдан ноқонуний фойдаланиш натижасида тизимга 46 миллиард 229 миллион сўмлик зарар етказилгани аниқланган.
Изоҳ (0)