Ўзбекистоннинг уч вилоятида 1 миллиард сўмдан ортиқ электр энергиясидан ноқонуний фойдаланиш ҳолатлари аниқланди, деб хабар беради Энергетика вазирлиги матбуот хизмати.
Қайд этилишича, “Ўзэнергоинспекция” томонидан ҳуқуқни муҳофаза қилувчи органлар ва “Ҳудудий электр тармоқлари” АЖ билан ҳамкорликда Сирдарё, Сурхондарё ва Фарғона вилоятларида ўтказилган назорат тадбирларида электр энергиясидан ноқонуний фойдаланиш ҳолатлари аниқланган. Хусусан:
- Мирзаобод туманидаги “И.Т” МЧЖга қарашли автомобилларга газ тўлдириш компрессор шохобчаси электр тармоғига ноқонуний уланиб, давлат манфаатларига 783 миллион 516 минг сўм (1 миллион 741 минг 247 кВт/соат);
- Термиз туманида фаолият юритиб келаётган “С.А.Ф.” МЧЖга қарашли иссиқхонанинг электр ҳисоблагичи нотўғри уланганлиги натижасида давлат манфаатларига 133 миллион 920 минг сўм (297 минг 600 кВт/соат);
- Ёзёвон туманида фуқаро А.Х. га тегишли чорва хўжалиги электр тармоғига ноқонуний уланиб олгани натижасида давлат манфаатларига 118 миллион 918 минг сўм (264 минг кВт/соат), жами 1 млрд 36 млн 354 минг миқдорида зарар етказган.
Ушбу ҳажмдаги электр энергияси 11 минг 514 та хонадоннинг бир ойлик истеъмолига тенг.
Аниқланган ҳолат юзасидан расмийлаштирилган ҳужжатлар белгиланган тартибда ҳуқуқни муҳофаза этувчи органларга тақдим қилинган.
Ўзбекистонда 2023 йилнинг 6 ойида электр энергиясидан ноқонуний фойдаланиш туфайли 78,5 миллиард сўм, табиий газдан ноқонуний фойдаланиш сабабли эса 231 миллиард 866 миллион сўм зарар кўрилган. Бундан олдин Бухоро шаҳрида фаолият юритиб келаётган корхона электр ҳисоблагичга ташқи таъсир кўрсатиши натижасида тизимга 2 миллиард сўмлик зарар етказилгани тўғрисида хабар берилганди. Мамлакатда август ойида электр энергияси ва табиий газдан ноқонуний фойдаланиш натижасида тизимга 46 миллиард 229 миллион сўмлик зарар етказилгани аниқланган.
Изоҳ (0)