Олий Мажлис Сенати раиси Танзила Норбоева бошчилигидаги Ўзбекистон делегацияси расмий ташриф билан Беларусда бўлиб турибди. Ташриф доирасида Минск шаҳрида Ўзбекистон–Беларусь бизнес доиралари ва тадбиркор аёллар биринчи бизнес-форуми бўлиб ўтди. Бу ҳақда Сенат ахборот хизмати хабар берди.
Маълум қилинишича, тадбирда бир қатор соҳаларида тадбиркорлик қилаётган ўзбекистонлик ва беларуслик ишбилармон аёллар иштирок этган. Улар қишлоқ хўжалиги, озиқ-овқат саноати, фармацевтика, маданий-гуманитар, туризм ва транспорт, IT, аёллар учун рақамли маҳсулотларни биргаликда ишлаб чиқиш, хотин-қизларни рақамли иқтисодиётга жалб этиш масалаларида мулоқот қилган.
Форум доирасида икки давлат вакиллари ўртасида декларация имзоланган ва ҳужжатда савдо-иқтисодий, инвестиция, илмий-техникавий, ижтимоий-маданий, таълим, гуманитар, туризм ва ўзаро манфаатли бошқа соҳалардаги ҳамкорликни кучайтириш масалалари акс этган.
“Икки мамлакат тадбиркор аёллари ўртасида “B2B” форматида ўтказилган учрашувлар натижасида 92 миллион доллардан ортиқ миқдорда 42 та шартнома ва 17 та меморандумлар имзоланди”,—дейилади хабарда.
Аввалроқ Танзила Норбоева Беларусга ташрифи давомида мамлакат президенти Александр Лукашенко билан учрашгани хабар қилинганди.
Изоҳ (0)