Ҳалол маҳсулотларга жаҳон талаби ортиб бормоқда. Шу муносабат билан Қозоғистон экспорт имкониятларини ошириш ниятида. Бу ҳақда Kazinform хабар берди.
Савдо ва интеграция вазирлигининг Техник жиҳатдан тартибга солиш ва метрология қўмитаси раиси Қуаниш Еликбоевнинг таъкидлашича, жамиятда товарларга қўйилган ҳалол белгисининг ишончлилиги ҳақида саволлар пайдо бўлмоқда.
“Очиқ айтамиз, ҳозир бу ихтиёрий, у қонунлар билан бевосита тартибга солинмаган. Билвосита, Соғлиқни сақлаш вазирлигидаги ҳамкасбларимиз мониторинг доирасида баъзида чўчқа гўштининг декларацияланмаган таркибий қисмларини аниқлайди ва маркалаш бўйича техник регламентлар талабларини бузганлик учун жарималар белгилайди. Амалдаги сертификатлаштириш органлари ҳам ишлаб чиқаришни назорат қилади”, — деди Еликбоев.
Қозоғистонда ҳалол инфратузилмасини ривожлантириш учун Савдо ва интеграция вазирлиги ушбу масалаларни қонунчилик даражасида тартибга солишни таклиф қилмоқда. Мамлакатда “Ҳалол” белгисини олиши мумкин бўлган 4000 дан ортиқ ишлаб чиқарувчилар бор — озиқ-овқатдан тортиб то тўқимачилик маҳсулотларигача.
“Мутахассисларнинг ҳисоб-китобларига кўра, гўшт тайёрлаш, гўштни қайта ишлашнинг 70-75 фоизи, асосий товар ва хизматлар бозорининг 65 фоизи ҳалол маҳсулот сифатида ўзини намоён қилади”, – дейди Қуаниш Еликбоев.
У жаҳонда ҳалол маҳсулотларга талаб ортиб бораётганини ҳисобга олиб, Қозоғистон уни ривожлантириш бўйича катта ишлар амалга ошираётганини айтди. Давлат даражасида 18 та миллий стандартлар мавжуд, МДҲ мамлакатлари учун 11 та давлатлараро стандартлар лойиҳаси ишлаб чиқилган.
Таъкидланишича, Қозоғистон ҳалол белгисини стандартлаштириш бўйича техник қўмитани биринчилардан бўлиб тузибгина қолмай, МДҲ доирасида бундай қўмитанинг котибиятига ҳам раҳбарлик қилади.
Қозоғистонда Евросиё иқтисодий иттифоқининг озиқ-овқат маҳсулотларининг ягона техник регламенти бўйича жами 100 дан ортиқ лаборатория аккредитациядан ўтган, улардан 37 таси таркибий қисмлар, жумладан, чўчқа гўштининг ДНКсини аниқлай олади.
“Ҳалол маҳсулотлар сертификатлари хорижда тан олинган ва Қозоғистон корхоналарига 10 йил давомида 1300 дан ортиқ сертификат берган ташкилотлар мавжуд. Улар орасида колбаса, ун, қандолат маҳсулотлари, ичимликлар, ярим тайёр маҳсулотлар, сут, асал ишлаб чиқарувчилар бор”, — дейилади хабарда.
Изоҳ (0)