Россия Тергов қўмитаси “Вагнер” раҳбари Евгений Пригожин 23 август куни Тверь вилоятидаги авиаҳалокатда ҳалок бўлганини тасдиқлади. Бу ҳақда “РИА Новости” хабар берди.
Самолёт қулаши оқибатида ҳалок бўлган 10 кишининг шахсига аниқлик киритилди. Улар орасида Пригожин ва “Вагнер” ўринбосари Дмитрий Уткин ҳам бор. Бунгача Росавиация самолёт йўловчилари рўйхатида Евгений Пригожин бўлганини тасдиқлаганди. Аммо Россия Тергов қўмитаси жасадлар куйиш аломатлари сабабли таниб бўлмайдиган даражага келгани учун уларни молекуляр-генетик экспертизадан ўтказганди.
“Тверь вилоятидаги авиаҳалокатни тергов қилиш доирасида молекуляр-генетик экспертиза якунланди. Уларнинг натижаларига кўра барчанинг шахси аниқланди, улар парвоз варақасида кўрсатилган рўйхатга тўғри келади”, — дейди Россия Тергов қўмитаси.
Самолётда бўлган йўловчилар рўйхати:
- Пригожин Евгений;
- Пропустин Сергей;
- Макарян Евгений;
- Тотмин Александр;
- Чекалов Валерий;
- Уткин Дмитрий (“Вагнер”қўмондони)
- Матусеев Николай.
Экипаж аъзолари:
- Левшин Алексей — қўмондон;
- Каримов Рустам — иккинчи учувчи;
- Распопова Кристина — стюардесса.
Пригожин самолёти ҳалокати
Россиянинг Тверь вилоятида 23 август куни “Вагнер” раҳбари Евгений Пиргожинга тегишли самолёт ҳалокатга учради, бортдаги 10 кишининг бари ҳалок бўлди. Самолёт йўловчилари орасида Пригожин бўлгани маълум қилинди, аммо унинг ўлими тасдиқланмаганди.
Россия президенти Владимир Путин ва Чеченистон раҳбари Рамзан Қодиров унинг оиласига ҳамдардлик билдирди.
“Мен Пригожинни жуда узоқ вақтдан бери: 1990 йилларнинг бошидан бери танийман. У тақдири мураккаб, ҳаётда жиддий хатоларга йўл қўйган одам эди. Керакли натижаларга эришди. У иқтидорли инсон, иқтидорли тадбиркор эди. Нафақат мамлакатимизда балки чет элда, хусусан, Африкада ҳам фаол ишлади. У ерда нефть, газ, қимматбаҳо металлар ва тошлар билан шуғулланган”, — деган Путин.
Песков “Вагнер” раҳбарининг ўлимига Путин алоқадорлигини рад этди. Тегишли фикрни Беларусь раҳбари Александ Лукашенко ҳам илгари сурди. У Пригожин ундан хавфсизлик кафолатлари сўрамагани ва “Вагнер” Беларусда қолишини айтди.
Украина президенти Владимир Зеленский ҳам воқеага муносабат билдирди ва Украинанинг бунга алоқадорлигини рад этди. У авиаҳалокат ортида ким турганини ҳамма тушунишини айтди.
Изоҳ (0)