АҚШ президенти Жо Байденнинг кузда Вьетнамга ташрифи ортидан Россия президенти Владимир Путин ҳам мазкур давлатга ташрифни режалаштираётганини билдирди. Бу ҳақда Fulcrum хабар берди.
Байден ўтган ҳафта “тез орада” Вьетнамга боришини айтди, бироқ санасига аниқлик киритмади. Унинг сафари катта эҳтимол билан сентябрь ойида Нью-Деҳлида бўлиб ўтадиган G20 саммити (9—10 сентябрь) муносабати билан бўлиб ўтади.
АҚШ раҳбари ташрифи мамлакатнинг Вьетнам билан муносабатни мустаҳкамлашга катта аҳамият бераётганини билдиради. Шу билан бирга, Путин 2023 йил охиригача Вьетнамга ташриф буюришга ҳам қизиқиш билдирган.
“Бу эса мамлакатни қийин дилеммага солиб қўяди, чунки бир томондан Байден ва Путиннинг ташрифи Вьетнамга мувозанатли ташқи сиёсат олиб бораётганини кўрсатади. Бошқа томондан, Россиянинг Украинага ҳужуми сабабли Вьетнам Путиннинг ташрифини бутун дунёга, айниқса, Ғарбга қандай тушунтириши ҳақида ўйлаши керак”, — дейилади хабарда.
Агар Путин Вьетнамга борса, бу жуда аҳамиятли бўлади, чунки у босқиндан кейин собиқ совет республикалари ва Эрондан, шунингдек, Туркияга бўлажак ташрифдан ташқари деярли ҳеч қандай халқаро ташрифни амалга оширмаган.
Бунинг сабабларидан бири Халқаро жиноий суд (ХЖС) Путинни ҳибсга олиш учун ордер берган, ХЖСга аъзо давлатлар эса Россия президенти мамлакатига келса, уни қўлга олиши керак.
Путин Хитойда бўлиб ўтадиган “Бир макон, бир йўл” форумида иштирок этганидан кейин Вьетнамга бориши мумкин. Бу икки сабабга кўра мантиқий бўлади.
“Биринчидан, Россия Ғарбнинг уни халқаро миқёсда яккалаб қўйишга уринишлари барбод бўлганини даъво қилиши мумкин. Иккинчидан, Москва Кремлнинг 2011 йилда эълон қилинган шарққа бурилиши нафақат Хитойга, балки Жануби-Шарқий Осиёга ҳам йўналтирилгани бўйича баҳслашиши мумкин. Энг муҳими, Хитой ҳам, Вьетнам ҳам ХЖС аъзоси эмас”, — дейилади хабарда.
Вьетнам раҳбарияти Путиннинг ташрифидан хурсанд бўладими, деган савол очиқ қолмоқда. Нашрнинг қайд этишича, Россия Вьетнамнинг эски дўсти ва Путиннинг ўзи Вьетнамда ниҳоятда машҳур бўлса-да, бу давлат Россия манфаати учун ўз миллий манфаатларини қурбон қилмоқчи эмас.
Изоҳ (1)
Зўравонлик билан ўз айбини хас-пўшламоқчи бўлишади, бундан ташқари зўрлик ишлатиш учун ундайлар кимларгадир ишонади. Шунинг учун у зўравонга ва у ишонган шахсга ҳам кескин чора кўриш керак.