Уйқунинг меъёрда бўлиши

Уйқунинг қанчалик сифатли экани иммунитетга ҳам бевосита таъсир қилмай қолмайди. Уйқунинг ёмон бўлиши қондаги кортизол миқдори ортиб, сурункали стрессга сабаб бўлиши, бу эса иммунитетнинг сусайишига олиб келиши мумкин. Шу сабаб ҳам, айниқса, кузда уйқунинг меъёрда бўлишига алоҳида эътибор бериш керак. Бир вақтда уйқуга ётиб, бир вақтда туришга одатланинг. Шу билан бирга, ухлашдан аввал ва уйғонгандан кейин туриб ўзингизга келиб олиш учун 30 дақиқа ажратинг. Ётоқнинг қулайлиги, хона етарлича қоронғи ва ҳаво бор эканига амин бўлинг. Хона салқинроқ бўлиши ва овоз ҳамда шовқинлар эшитилмаслиги керак. Уйқудан 15-20 дақиқа аввал гаджетларни ўчириб қўйинг. Улардаги сунъий ёруғлик циркад ритмига салбий таъсир таъсир қилиши мумкин. Шунда ҳам уйқуда ҳаловат бўлмаса, тиреотроп гормони, D витамин ва магний миқдорини текширтириб кўриш, танқислик кузатилса, ўз вақтида шифокор билан маслаҳатлашиб, уни бартараф қилиш керак.

Сабзавот ва меваларни канда қилмаслик

Кундалик рационда камида 600 грамм барра мева ва сабзавотлар бўлишига эътибор беринг. Уларда А, D, E, K, B, С сингари иммунитетни мустаҳкамловчи витаминлар, шунингдек, ичаклар фаолияти учун аҳамиятли бўлган клетчаткалар мужассам бўлади. Ҳеч қайси биологик фаол қўшимчалар табиий маҳсулотларнинг ўрнини боса олмаслигини унутманг. Олма, сабзи, исмалоқ, брокколи ва қизил булғор қалампири бу борада айни муддао ҳисобланади.

Жисмоний фаол бўлиш

Иммунитетни мустаҳкамлаш учун ярим соат тоза ҳавода сайр қилиш ва кун давомида бажарилган 10 дақиқалик жисмоний машқ кифоя қилади. Машқлар жуда ҳам оддий: ўтириб-туриш, қўлларни кўтариб пастга тушириш ёки арқонда сакрашдан иборат бўлиши мумкин. Доимий равишда кардиофаоллик ва ҳафта давомида 2-3 марта спорт залга борилса, яна яхши.

D витаминига бой маҳсулотларни истеъмол қилиш

Иммунитетни мустаҳкамлаш билан бирга, организмни турли шамоллаш ва инфексион касалликлардан ҳимоя қиладиган D витамини ёғли балиқ маҳсулотлари, тухумнинг сариғи, сариёғ, пишлоқ ҳамда мол гўштида бисёр бўлади. Шу сабаб ҳам ушбу маҳсулотларни рационга киритинг ва D витаминини қўшимча сифатида қабул қилинг. Ушбу витаминнинг кунлик меъёри шифокор кўрсатмасисиз 2000 ME дан ошмаслиги керак.

Контраст душ қабул қилиш

Контраст душ қабул қилиш қон-томирлар ва асаб тизими аҳволини яхшилаш билан бирга, иммунитетни кўтаришнинг ҳам энг самарали усулларидан ҳисобланади. Жараёнда қон-томирлар торайиб, кенгайгани ҳисобига қон айланиши ва аъзолар ҳужайраларининг қон билан таъминланиши яхшиланади. Аъзолар фаолияти қанчалик яхши бўлса, иммунитет бактерия ва вируслар билан шунча яхши курашади. Дарҳол тетиклаштиргани ва кун давомида энергияга тўла юришга ҳисса қўшгани учун ҳам контраст душни тонгда қабул қилган яхши.