Нидерландия украиналик учувчиларни ўқитишни тугатгандан сўнг, Украинага Американинг 42 та F-16 қирувчи самолётини топширади. Бу ҳақда Нидерландияда амалий ташриф билан бўлган Украина президенти Владимир Зеленский маълум қилди.
“(Нидерландия бош вазири) Марк Рютте билан мен учувчиларимиз ва муҳандисларимиз ўқитилганидан сўнг, Украинага бериладиган F-16 самолётлари сонини келишиб олдик. 42 та самолёт. Ва бу фақат бошланиши. Нидерландияга раҳмат!” — деди Украина раҳбари Нидерландия бош вазири билан музокаралардан сўнг.
Зеленский ўзининг Telegram каналида F-16 самолёти олдида Рютте билан тушган селфини ҳам жойлаштирди.
Рютте, Зеленский билан қўшма матбуот анжуманида, F-16 самолётларини етказиб бериш шартлари бажарилгач, Нидерландия ва Дания уларни Украина ҳаво кучларига топширишини эълон қилди. У май ойида Нидерландия Украина ҳарбийларини F-16 билан учишга ўргатишни ваъда қилганини эслатди.
“Аммо самолётлар бўлмаса, машғулотлар ўтказишнинг имкони йўқлигини ҳамма тушунади. Бошқача қилиб айтадиган бўлсак, самолётлар билан машқ қилиш учун уларни етказиб бериш керак”, — деди Нидерландия бош вазири.
Рютте, шунингдек, Нидерландия ҳаво кучларида 42 та F-16 қирувчи самолёт борлигини, бироқ уларнинг барчаси Украинага ўтказилиши ҳақида гапиришга ҳали эрта эканини таъкидлади, деб ёзади Reuters.
Дания F-16 қирувчиларини Киевга беришини тасдиқлади.
Нидерландиядан кейин Данияга ташрифи чоғида Зеленский мамлакат бош вазири Метте Фредериксен билан учрашди. Фредериксен хоним Копенгаген Киевга 19 та самолёт топширишини маълум қилди. У F-16 самолётларининг биринчи партияси янги йил олдидан Украинага етказилишига умид қилмоқда.
Зеленский Дания бош вазири билан F-16 қирувчиларидан бирига миниб кўрди.
Владимир Зеленский ва Американинг F-16 қирувчи самолётларига эга Европа давлатлари раҳбарлари май ойи ўрталарида ҳам қирувчиларни Киевга етказиб бериш ҳақида келишиб олганди. Гап Европа мамлакатлари Қуролли кучларидаги самолётлар ҳақида кетмоқда. АҚШ ўз қирувчиларини юбориши ҳақида хабар бермаган.
Июль ойида Дания ва Нидерландия бошчилигидаги 11 давлатдан иборат коалиция украиналик учувчиларни Ф-16 учишини ўқитишни бошлашга тайёрлиги, бироқ Вашингтоннинг расмий рухсатисиз буни амалга ошира олмаслиги маълум бўлди. Август ойи бошида Пентагон бунга рухсат берилганини билдирди.
Украина қирувчиларни қачон олади?
ОАВ ҳисоб-китобларига кўра, Украина F-16 ни 2024 йилдан олдин олмайди. Хусусан, Тhе Washington Post газетаси украиналик учувчиларни тайёрлаш фақат январь ойида бошланишини, чунки бунгача улар Буюк Британияда тўрт ой давом этадиган инглиз тили курсларини ўташи кераклигини ёзган. Қирувчиларда учиш машғулотлари яна олти ой давом этади.
18 август куни Reuters агентлиги Қўшма Штатлар Дания ва Нидерландиядан F-16 қирувчи самолётларини Украинага жўнатишни маъқуллагани ҳақида хабар берди. Дания Мудофаа вазирлиги Украина учувчилари август ойи охирида ушбу мамлакатда қирувчи самолётларда машғулотларни бошлашини маълум қилди.
Изоҳ (0)