“Манчестер Юнайтед” жинсий зўравонликда айбланган Мэйсон Гринвуд борасида расмий баёнот берди 

Мэйсон Гринвуд “Манчестер Юнайтед”ни тарк этади.

Клуб футболчининг зўравонлик билан боғлиқ ички текширув натижаларини сарҳисоб қилди ва ярим ҳимоячи айбсиз деган хулосага келди. 

Шу билан бирга, томонлар футболчининг “Манчестер Юнайтед”даги фаолиятини давом эттириши қийин бўлади деган хулосага келди. Томонлар ҳамкорликни тугатиш устида иш бошлади. 

“Бизда мавжуд бўлган далилларга асосланиб, интернетга жойлаштирилган материаллар тўлиқ тасаввурни бермагани ва Мэйсон ўзи айбланган жиноятларни содир этмаган деган хулосага келинди. Шу билан бирга, Гринвуд омма олдида тан олганидек, хатоларга йўл қўйган, бунинг учун жавобгарликни зиммасига олади. 

Бу жараёнда иштирок этганларнинг барчаси, жумладан, Мэйсоннинг ўзи ҳам фаолиятини “Манчестер Юнайтед”да давом эттириши қийинлигини билади. Шу боисдан, биз футболчи билан ҳамкорликни тугатиш устида иш бошладик”, — дейилади клуб баёнотида. 

Эслатиб ўтамиз, Гринвуд жинсий зўравонлик, ўлим билан таҳдид қилишда гумон қилинган. 2022 йил 2 февралда у гаров эвазига озод қилинганди. Июнь ойида эса гаров эвазига озод қилиш муддати узайтирилганди. 

2022 йил октябрь ойида Гринвуд уни жинсий зўравонликда айблаган қиз билан алоқага чиққани учун яна ҳибсга олинган. 

2023 йилнинг февраль ойида Манчестер полицияси Гринвуддан барча айблар олиб ташланганини маълум қилди.