Ўзбекистонда 2023/2024-ўқув йилидан бошлаб умумтаълим мактабларида ўқувчиларни битта касб-ҳунарга ўргатиш амалиёти йўлга қўйилади, деб хабар бермоқда Мактабгача ва мактаб таълими вазирлиги матбуот хизмати.
Жами 208 та умумий ўрта таълим муассасасида 10-синфдан бошлаб ўқувчиларга битта касб-ҳунарга ўргатиш ишлари амалга оширилади. Ўқувчиларга ўргатиладиган битта касб-ҳунар тури ва улар амалиёти йўлга қўйиладиган умумий ўрта таълим муассасалари рўйхати шакллантирилди.
Бунга кўра, умумий ўрта таълим муассасаларида касбий таълим фани учун ажратилган ўқув соатлари ўқувчиларга ўргатиладиган касб-ҳунар туридан келиб чиққан ҳолда тақсимланади.
Танлаб олинган 208 та мактабда ўқувчилар қизиқишидан келиб чиқиб, қуйидаги 3 йўналишлардан бири бўйича касб-ҳунар ўргатилади:
- ишчи касблар (ҳудуднинг ижтимоий-иқтисодий хусусиятидан келиб чиқиб, тадбиркор ва ҳунармандлар жалб қилинган ҳолда 64 турда),
- тадбиркорлик (21 турдаги ишлаб чиқариш ва хизмат кўрсатиш соҳалари бўйича),
- замонавий касблар (10 дан ортиқ ахборот технологиялари ва креатив индустрия йўналиши бўйича).
Ўқувчиларга ўргатиладиган битта касб-ҳунар тури ва улар амалиёти йўлга қўйиладиган умумий ўрта таълим муассасалари рўйхати билан қуйидаги ҳавола орқали танишиш мумкин.
Маълумот учун, 2023/2024-ўқув йилида 17 минг нафардан ортиқ умумий ўрта таълим муассасаларининг 10-синф ўқувчиларига касб-ҳунарга ўргатилади.
Изоҳ (0)