Ҳафта охирида ҳарорат пасайиши кутилмоқда, деб хабар берди “Ўзгидромет”.
Маълум қилинишича, 11 август куни Ўзбекистон ҳудудига Урал ҳудудларидан нисбатан салқин ҳаво тарқала бошлайди ва ҳарорат фони республика бўйича аста-секин пасаяди. Кундузи ҳудуднинг катта қисмида ҳаво ҳарорати 33-36 даража атрофида бўлади, ҳатто жанубий ҳудудларда ҳам 38-40 даражадан юқори бўлмайди.
Дам олиш кунлари ҳароратнинг аста-секин пасайиши давом этади. Якшанба куни кундузги ҳарорат 30-32 даражадан, жанубда 35 даражадан ошмайди.
Ушбу кунларда ҳудуднинг катта қисмида қуруқ ва кам булутли об-ҳаво сақланиб туради, фақат Тошкент вилояти ва Фарғона водийси вилоятларининг тоғолди ва тоғли ҳудудларида қисқа муддатли ёмғир ёғиши, момақалдироқ бўлиши мумкин.
12–13 август кунлари баъзи жойларда шамол тезлиги чанг-тўзон билан 13-18 метр/секундгача кучайиши кутилмоқда. Республиканинг айрим ҳудудларида шамол тезлигининг кучайиши баъзида 20-22 метр/секундга етиши мумкин.
Кейинги ҳафтанинг ўртасида кундузги ҳаво ҳарорати 27-30 даражагача янада пасаяди. Айниқса кечаси ва эрталаб ҳавонинг салқинлашиши сезиларли бўлиб, ҳарорат 13-16 даражагача пасаяди.
Тошкентда 11–13 август кунлари ҳаво кам булутли бўлади. Бугун ҳарорат кундузи 34-36 даража, шанба куни 32-34 даража, якшанба куни 30-32 даража бўлади. Шарқий йўналишдаги шамол тезлиги бир оздан ўртачагача эсади, кечалари 10-12 метр/секундгача кучайиши мумкин.
Изоҳ (0)