Тошкент, Фарғона ва Қашқадарё вилоятларида пул эвазига ишга киритиб қўйишни ваъда қилган шахслар ушланди, деб хабар беради Бош прокуратура ҳузуридаги департамент.
Маълум қилинишича, департаментнинг Бағдод туман бўлим томонидан ИИБ ходимлари билан ҳамкорликда тезкор тадбир ўтказилди. Тадбирда фуқаро Р.Қ. икки нафар фуқаронинг ишончига кириб, уларни юқори лавозимда ишловчи танишлари ёрдамида 4 минг доллар ва 30 миллион сўм эвазига ички ишлар органларига ишга киритиб қўйишини айтиб, олдиндан 30 миллион сўмни олган вақтида ашёвий далиллар билан ушланган.
Шу каби, департаментнинг Қашқадарё вилоят бошқармаси томонидан ўтказилган тезкор тадбирда Ш.П. исмли шахс фуқаро С.Қ.ни юқори лавозимда ишловчи танишлари ёрдамида Касби туман тиббиёт бирлашмасига ҳамширалик вазифасига ишга киритиб қўйиш эвазига 1 000 долларни олган вақтида ушланиб, унинг кўрсатмасига асосан давом этган тадбирда ушбу тиббиёт бирлашманинг хўжалик бўлими мудири К.Ч. фуқаро Ш.П.дан 1 000 долларни олган вақтида ашёвий далиллар билан ушланган.
Департаментнинг Бекобод шаҳар бўлими томонидан ДХХ ва ИИБ ходимлари билан ҳамкорликда ўтказилган тезкор тадбирда эса Д.Ж. исмли шахс фуқаро З.К.ни танишлари ёрдамида “Ўзметкомбинат” АЖ ички қўриқлаш хизматига қўриқчи вазифасига ишга киритиб қўйиш эвазига 700 долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Ноқонуний ишга киритиш ҳолатлари
Бундан олдин Самарқандда Миллий гвардияга ишга киритиб қўйишни ваъда қилиб, 27 минг АҚШ долларини ўзлаштирган фуқарога жиноят иши қўзғатилгани, Бухорода фуқарони Миллий гвардияга ишга қўйиш эвазига 2 000 доллар олган шахслар ушлангани, Самарқандда ҳарбий олийгоҳлар ва Темурбеклар мактабига ўқишга киритишини айтиб, фуқаролардан қарийб 10 500 доллар пул олган аёл қўлга олингани тўғрисида хабар берилганди.
Шунингдек, Самарқанд, Жиззах ва Фарғона вилоятларида пул эвазига ишга жойлаштириб қўйиш билан боғлиқ фирибгарлик ҳолатлари фош этилганди.
Изоҳ (0)