Давлат активларини бошқариш агентлиги 2022 йилда энг кўп фойда кўрган ва энг кўп зарар кўрган давлат иштирокидаги корхоналар рўйхатини эълон қилди.
Энг кўп фойда кўрган корхоналар ўнталиги
Биринчи ўринни 15,3 триллион сўм билан жаҳонда олтин ишлаб чиқарувчи энг йирик компаниялардан бири ҳисобланган Навоий кон-металлургия комбинати (НКМК) эгаллади. Бу Ўзбекистонда йиллик соф фойдаси 1 миллиард доллардан ошган ягона компаниядир.
Ундан кейинги ўринни қарийб 6,6 триллион сўмлик фойда билан Олмалиқ кон-металлургия комбинати (ОКМК) эгаллади. NBU эса 2,4 триллион сўм билан учинчи ўриндан жой олди. Таққослаш учун, Ўзбекистон миллий банки 2021 йил якуни бўйича топ-10 таликка ҳам кирмаган эди.
Энг кўп фойда кўрган корхоналар ўнталигидан, шунингдек, “Навоиюран”, “Навоиязот”, “Ўзметкомбинат”, UzBAT, 75 фоиз давлат улуши Венгриянинг OTP банкига сотилган “Ипотека банк”, “Ўзбекнефтгаз” ва “Ўзавтосаноат” ҳам жой олди.
Энг кўп зарар кўрган корхоналар ўнталиги
Энг кўп зарар кўрган “Ўзбекистон миллий электр тармоқлари” бўлди — 2022 йилни 4,3 триллион сўм зарар билан якунлади. Иккинчи ўринни UzGasTrade эгаллади. Энг кўп зарар кўрган корхоналар қаторидан “Ўзбекистон темир йўллари”, “Тошшаҳартрансхизмат”, “Ҳудудий электр тармоқлари” ҳам ўрин олди.
2022 йил 1 январь ҳолатига кўра, давлат иштирокидаги корхонлар сони 2144 тани ташкил этган. Шундан 231 таси — акциядорлик жамияти, 871 таси — масъулияти чекланган жамият ва 1042 таси — давлат унитар корхоналари ҳисобланади.
Изоҳ (0)