AҚШ Тайванга қурол сотиш орқали уни “порох бочкасига” айлантирмоқда. Бу ҳақда Хитой Мудофаа вазирлиги расмий вакили Тан Кефей маълум қилди.
“Хитой АҚШнинг Тайванга қурол-яроғ сотишига кескин қарши чиқмоқда, АҚШга кескин баёнотлар юборди. Қўшма Штатлар эса Тайван бўғози бўйлаб тарангликни атай кучайтирмоқда, бу Тайваннинг порох бочкасига айланишини тезлаштириш ва Тайван халқини фалокат тубига итариш билан баробардир”, — деди Тан Кефей журналистнинг Тайван АҚШдан 440 миллион долларга қурол сотиб олаётгани бўйича Хитойнинг позицияси ҳақидаги саволга жавоб бериб.
Пекин Вашингтонни “ягона Хитой тамойили”га риоя қилишга ва Тайпейга қурол сотишни, шунингдек, “АҚШ ва Тайван ўртасидаги ҳар қандай ҳарбий келишувни” дарҳол тўхтатишга, Тайван мустақиллигини қўллаб-қувватламаслик мажбуриятини бажаришга чақирди. Тан Кефейнинг огоҳлантиришича, Хитой армияси миллий суверенитет ва ҳудудий яхлитликни, жумладан, Тайван бўғозидаги барқарорликни қатъий ҳимоя қилади
АҚШ Давлат котиби Энтони Блинкен билан бўлиб ўтган учрашувда Хитой Коммунистик партияси Марказий қўмитасида Хитой дипломатияси куратори Ван И Пекин Тайван ва унинг ҳудудий яхлитлиги масаласида муросага келмаслигини айтганди. У, шунингдек, икки давлат ўртасидаги муносабатлар боши берк кўчага кириб қолганини, АҚШ ва Хитой можаро ёки ҳамкорликни танлаши керак бўлган муҳим босқичда эканини таъкидлаган.
30 июнь куни АҚШ Давлат департаменти Тайванга 440 миллион долларлик ўқ-дорилар сотишни маъқуллади.
Хитой Тайванни ўз провинцияси деб билади. АҚШ Хитойнинг Тайван устидан суверенитетини расман тан олган, бироқ Пекин оролни куч билан эгаллашга қарор қилса, Вашингтон бунга йўл қўймаслигидан огоҳлантирган.
Аввалроқ Хитой раҳбари Си Цзиньпин армияни “урушга тайёрланишга” чақирганди.
Изоҳ (0)