Республика нашрларидан бирида Ўзбекистонда электромобиллар савдоси сезиларли даражада ошгани ҳақидаги мақола чоп этилган эди. “Ўзавтосаноат” мавжуд муаммоларга бефарқ бўлмаган ҳолда ўз муносабатини билдирган нашриётга миннатдорчилик билдиради ҳамда компаниянинг таркибий бўлинмалардан бири ҳисобланган UzAuto Motors заводида айни пайтда ишлаб чиқариш ҳажмининг доимий равишда ўсиб бораётганига қарамай, мамлакатнинг автомобилларга бўлган юқори талабини тўлиқ қоплай олмаётганини тан олади.
Республика иқтисодиётининг барқарор ўсиши ҳамда аҳоли турмуш фаровонлигининг ошиши натижасида миллий автомобилсозлик маҳсулотларига бўлган талабнинг ортиш даражасини табиийки, 6 йил аввалги кўрсаткичлар билан таққослаб бўлмайди. Бугунги кунда маҳаллий бозор айнан рақобатбардош автомобиль брендлари учун янада жозибадор бўлиб бораётганини сезиш қийин эмас.
“Ўзавтосаноат” доимий равишда мавжуд халқаро брендларни ўрганиб бормоқда ва дунёдаги автомобилсозлик соҳасининг етакчилари билан ҳамкорлик ва кооперацион муносабатларни йўлга қўйиш мақсадида янги имкониятларни изламоқда. Қолаверса, Ўзбекистонда замонавий ҳамда экологик жиҳатдан долзарб бўлган автопарклар сонини кўпайтиришга қизиқиш билдирмоқда.
Шундай қилиб, жорий йилнинг май ойида “Ўзавтосаноат” АЖ ҳамда BYD Company Ltd. ҳамкорлигида Ўзбекистонда электромобиллар ишлаб чиқаришга ихтисослашган BYD Uzbekistan Factory заводининг қурилиши бошланди.
Статистик маълумотлардан кўриш мумкинки, жорий йилда Ўзбекистонга олиб келинган 5 400 дан ортиқ электромобилларнинг 3 255 донаси маҳаллий бозор дастурини ўрганиш доирасида “Ўзавтосаноат” АЖ таркибий бўлинмаси саналган BYD Uzbekistan Factory компанияси томонидан етказиб берилган.
“Ўзавтосаноат” конструктив мулоқот ўрнатиш тарафдори бўлиб Ўзбекистонда экологик тоза транспортлар улушини кўпайтириш, бозорни янада эркинлаштириш қолаверса, мамлакат автомобиль бозорига янги автоконцернларнинг кириб келишидан манфаатдор эканини маълум қилади. Бу, албатта, ички бозорда автомобилларнинг рақобатбардошлигини оширишга ижобий таъсир кўрсатади ва автомобиль ишлаб чиқарувчиларнинг ривожланишини рағбатлантириш учун барча шароитларни яратади.
Изоҳ (0)