Навоий 200 млн сўмга, Сирдарёда эса 16,5 минг долларга ноқонуний ер сотмоқчи бўлганлар ушланди

Навоий ва Сирдарё вилоятларида ер майдонлари ноқонуний сотилишининг олди олинди, деб хабар беради Бош прокуратура ҳузуридаги департамент.

Маълум қилинишича, департаментнинг Хатирчи туман бўлими томонидан ДХХ ва ИИБ ходимлари билан ҳамкорликда тезкор тадбир ўтказилган. Тадбирда “П.Н.” фермер хўжалиги раҳбари Н.П. хўжаликнинг 1,4 гектар суғориладиган ер майдонини фуқаро Ш.Ш.га гўёки туман қишлоқ хўжалиги бўлимида ишловчи танишлари орқали унинг номига расмийлаштириб бериш эвазига 200 миллион сўмни олган вақтида ашёвий далиллар билан ушланган.

Шу каби, департаментнинг Гулистон туман бўлими томонидан ДХХ ва ИИБ ходимлари билан ҳамкорликда ўтказилган тезкор тадбирда фуқаро Т.Э. ўзига сабзавотчилик йўналишида фермер хўжалиги ташкил этиш учун ажратилган 5,8 гектар суғориладиган ер майдонини фуқаро Б.Д.га 16,5 минг долларга сотишга келишиб, танишлари ёрдамида расмийлаштириб беришни ваъда қилиб, олдиндан 9,9 минг доллар ва 1,15 миллион сўмни олган вақтида ашёвий далиллар билан ушланган.

Мазкур ҳолатлар юзасидан Жиноят кодексининг 229-6-моддаси (суғориладиган ер участкасига ёки унинг бир қисмига бўлган ҳуқуқни сотиш ёхуд қонунга хилоф равишда бошқача тарзда ўзга шахсга бериш) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.

Ноқонуний ер савдолари

Апрель бошларида Навоийда 80 гектар ерни 1 миллиард сўмга сотишга уринган шахслар қўлга олингани, Самарқанд ва Фарғонада ноқонуний ер сотиш ҳолатларига чек қўйилгани тўғрисида хабар берилганди. Шунингдек, Қорақалпоғистон Республикаси ва Бухоро вилоятида ер майдонлари савдоси билан боғлиқ фирибгарлик ҳолатлари фош этилган эди.