Шуша шаҳрида Ўзбекистон инвестициялар, саноат ва савдо вазири Лазиз Қудратов ва Озарбайжон иқтисодиёт вазири Микаил Жабборов раислигида икки мамлакат ўртасида ҳамкорлик бўйича Ҳукуматлараро қўшма комиссиянинг 12-йиғилиши бўлиб ўтди. Бу ҳақда “Дунё” агентлиги хабар берди.
Инвестициялар, саноат ва савдо вазирлиги маълумотига кўра, мулоқотда икки давлатнинг асосий вазирлик, идора, тармоқ бирлашмалари, тижорат банклари ва таълим муассасалари, шунингдек, дипломатик ваколатхоналари раҳбарлари иштирок этган.
Йиғилишда шу кунгача эришилган келишувларни амалда татбиқ этишдаги муваффақиятлар қайд этилди. Биргина 2022 йилда Ўзбекистон—Озарбайжон ўртасидаги товар айирбошлаш ҳажми 1,5 баробар, 2023 йил бошидан буён эса бу кўрсаткич 16 фоизга ошди. Жумладан, Озарбайжонга тўқимачилик маҳсулотлари етказиб бериш ҳажми 2,6 баробар, механик ускуналар етказиб бериш 19,7 фоиз, шиша ва шиша буюмлар етказиб бериш 76 фоизга ошди. Шу нуқтаи назардан, яқин йилларда ўзаро товар айирбошлаш ҳажмини 1 миллиард долларга етказиш учун икки мамлакат иқтисодиётлари етарли салоҳиятга эга экани алоҳида таъкидланган.
Саноат кооперациясини ривожлантириш бўйича биргаликда иш олиб боришга алоҳида эътибор қаратилган. Таъкидланишича, сўнгги беш йилда Ўзбекистонда Озарбайжон капитали иштирокида ташкил этилган қўшма корхоналар сони 4 баробар ошган. Икки йил ичида 40 га яқин корхона ишга тушган. Ўз навбатида, Озарбайжонда Ўзбекистон сармояси иштирокидаги 70 дан ортиқ корхона муваффақиятли фаолият юритмоқда.
Учрашувда энергетика ва транспорт соҳаларида ҳамкорликни кенгайтириш, ҳудудлараро, маданий-гуманитар алоқаларни ривожлантириш масалалари ҳам кўриб чиқилган.
Тадбир якунлари бўйича Ўзбекистон ва Озарбайжон ўртасидаги ҳамкорлик бўйича ҳукуматлараро қўшма комиссиянинг 12-йиғилиши баённомаси ҳамда ҲК доирасида эришилган келишувларни мустаҳкамловчи бошқа бир қатор ҳужжатлар имзоланган.
Изоҳ (0)