Туркманистон миллий етакчиси, Туркманистон Халқ Маслаҳати раиси Гурбангули Бердимуҳамедов Арқадағ шаҳрига қилган иш сафарида электромобилни синовдан ўтказди. Бу ҳақда Turkmenportal хабар берди.
Туркманистон пойтахтидан 30 километр жануби-ғарбда 950 гектар майдонда қурилаётган Арқадағ шаҳрида ер усти электр транспортини жорий этиш режалаштирилган. Бу Туркманистонда жамоат электр транспортидан фойдаланишнинг биринчи факти бўлади. Бердимуҳамедов замонавий электробуслар ва электромобилларни кўздан кечирди.
Ушбу турдаги транспортнинг хусусияти унинг рақамли тизимга уланиши ва эшигида QR-код мавжудлигидир. Бу электротакси ҳақида тўлиқ маълумот олиш, унинг техник хусусиятлари, жойлашуви, ҳайдовчи маълумотларини олиш имконини беради. Янги турдаги жамоат транспорти билан танишган Туркманистон Халқ Маслаҳати раиси электромобилни синовдан ўтказди. Гурбангули Бердимуҳамедов унинг техник ҳолатини текширди.
Эслатиб ўтамиз, Арқадағда тахминан 70 минг киши истиқомат қилади. Бу ерда смартфон орқали бошқариладиган “ақлли” турар жой бинолари, ҳокимлиги ва бошқа муассасалар бинолари барпо этилди.