ДХХ ва бошқа ҳуқуқни муҳофаза қилувчи идоралар билан ҳамкорликда ўтказилган тезкор тадбирда фуқароларни АҚШ, Канада ва Польшага юбориш билан шуғулланган шахслар қўлга олинди.
Самарқанд вилоятида ўтказилган тезкор тадбирда Оқдарё туманида яшовчи, 1992 йилда туғилган шахс танишлари орқали Тайлоқ туманида истиқомат қилувчи икки фуқарони Ўзбекистон—Испания—Мексика—АҚШ йўналишида Америкага юбориш эвазига 44 минг АҚШ доллари талаб қилиб, олдиндан 40 минг доллар олган вақтида ушланган.
ДХХ Жиззах вилояти бўйича бошқармаси ва Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбирда Тошкентнинг Олмазор туманида яшовчи, 1995 йилда туғилган шахс Ғаллаорол туманида истиқомат қилувчи, 1990 йилда туғилган фуқаронинг ишончига кириб, юқори лавозимда ишловчи танишлари орқали уни Канада давлатига ишга юбориш ва виза ҳужжатларини расмийлаштириб бериш эвазига 15 минг доллар талаб қилиб, олдиндан 7,5 минг доллар олган вақтида ушланган.
Бошқа ҳолатда эса Тошкент шаҳрида фаолият юритувчи МЧЖ раҳбари мансабдор танишлари орқали 3 нафар фуқарони Польшага ишлаш учун юбориш эвазига 5100 АҚШ доллари олган вақтида ДХХ Тошкент шаҳар бўйича бошқармаси ҳамда Бош прокуратура ҳузуридаги Департамент ходимлари томонидан ушланган.
ДХХ Сурхондарё вилояти бўйича бошқармаси ходимлари томонидан бошқа ҳуқуқни муҳофаза қилувчи идоралар билан ҳамкорликда ўтказилган тезкор тадбирда Бойсун туманида яшовчи, 1998 йилда туғилган шахс Музработ туманида истиқомат қилувчи, 1983 йилда туғилган фуқарони тегишли виза ҳужжатларини расмийлаштириб, Канадага ишга юбориш эвазига 138 миллион сўм олган вақтида ушланган.
У муқаддам фирибгарлик жинояти содир этганлиги учун жиноий жавобгарликка тортилган бўлса-да, ўз хатосидан тўғри хулоса чиқармаган.
Ҳозирда мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Изоҳ (0)