АҚШнинг Украинага келгуси ёрдами, шунингдек, президент Жо Байденнинг халқаро обрўси Украина Қуролли кучлари қарши ҳужумининг муваффақиятига бевосита боғлиқ. Бу ҳақда юқори мартабали америкалик амалдорлар Politico нашрига анонимлик шарти билан маълум қилди.
Нашр суҳбатдошлари, агар Украинанинг ҳужуми етарли даражада муваффақиятли бўлмаса ёки бутунлай муваффақиятсизликка учраса, Украинага ҳарбий ва иқтисодий ёрдам тугаб битиши, можарони дипломатик йўл билан ҳал қилишга чақириқлар тобора баландроқ янграши мумкинлигини тахмин қилмоқда.
Хусусан, нашр манбаларининг айтишича, ҳозирги ёрдам пакети тугаганидан кейин Конгресс Украина учун қўшимча маблағ ажратишни қўллаб-қувватламаслиги мумкин. Расмийлар, шунингдек, Украина ҳужумининг бошланишидаги ҳар қандай нотўғри қадам Конгрессда республикачилар томонидан демократларнинг мудофаа харажатларини ошириш ташаббусини блоклаш учун баҳона бўлиши мумкинлигини айтди.
Нашр, шунингдек, Вашингтонда Россия ҳудудига қилинган ҳужумлардан хавотир ортиб бораётганини қайд этди. Украина раҳбарияти ушбу зарбаларга алоқадорлиги ҳақидаги маълумотни тасдиқламаган бўлса-да, америкалик амалдорлар бунга шубҳа қилмоқда. Улар Киев ёки ҳеч бўлмаганда Украина тараф кучлар Кремлга қилинган дронлар ҳужумига, шунингдек, россиялик Z-блогер Владлен Татарскийнинг ўлимига сабаб бўлган портлашлар учун жавобгар, деб ҳисобламоқда. Politico газетасининг ёзишича, бундай воқеалар муносабати билан АҚШ дипломатик каналлар орқали аллақачон бир қатор қаттиқ огоҳлантиришлар берган.
Шу билан бирга, нашр манбалари Украина ҳужумининг муваффақияти Ғарбнинг Украинани қўллаб-қувватлашини кучайтириши мумкинлигини истисно қилмади.
Май ойида Politico АҚШ Россия—Украина урушини узоқ йилларга музлатиб қўйиш имкониятини рад этмагани ҳақида ёзганди. Ўз навбатида, Москва ҳам Киев ҳам бундай сценарийга қарши чиққан.
Изоҳ (0)