Қозоғистонликлар энг кўп қайси президентни ёқтирмайди? — сўровнома

Demoscope жамоатчилик фикрини мониторинг қилувчи бюро қозоғистонликлар ўртасида сўровнома ўтказди. Маълум бўлишича, республика аҳолисининг аксарияти Қосим-Жўмарт Тўқаевни яхши кўради, деб хабар бермоқда “Дарё”нинг Қозоғистондаги мухбири.

Сўровномага кўра, қозоғистонликлар энг кўп Россия президенти – Владимир Путинни ёқтирмайди. У “ёқмайди” йўналиши бўйича 32 фоиз овоз тўплаган. Чорак фоиз овоз Владимир Зеленский ва Жо Байденга берилган. Си Цзиньпин учун — 20 фоиз. Энг кам қозоғистонликлар ёқтирмайдиган президент — Эрдўғон бўлиб чиқди, у 5,5 фоиз овоз олган. Қосим-Жўмарт Тўқаевни ёқтирмаганлар овози 6,9 фоизни ташкил этган.

Россия ва Украина ўртасидаги урушда қозоғистонликларнинг аксарияти Украинани қўллаб-қувватламоқда – 21,1 фоиз. Россияликларни 12 фоиз респондент қўллаган бўлса, 60 фоиз иштирокчилар нейтрал қолмоқда. Шунча респондентлар (61 фоиз) Россия ҳеч қачон Қозоғистонга ҳужум қилмайди, деб ҳисобласа, 23,3 фоизи бундай бўлиши мумкинлигини истисно қилмаган.

54 фоиз қозоғистонликлар уруш муроса билан якунланишига ишонмоқда. Уларнинг кичик қисми у ёки бу томон ғалаба қозонади деган фикрда. Шу билан бирга, социологлар таъкидлаганидек, энг россияпараст позицияни Россия теледастурларидан маълумот оладиган 60 ёшдан юқори фуқаролар эгаллайди. Ёш қозоғистонликлар Россия ва Путин сиёсатини энг кўп танқид қилмоқда.

Талгат Сатибалди, Остона