АҚШ президенти Жо Байден Америка университетларида фаластинликларни қўллаб-қувватловчи талабалар намойишлари унинг Яқин Шарқ минтақасига нисбатан сиёсатини ўзгартирмаслигини айтиб ўтди.
“Мен тушунаман, одамларда бу борада кучли ҳис-туйғулар бор ва уларнинг ўз эътиқодлари бор. Қўшма Штатларда биз уларнинг фикр билдириш ҳуқуқини ҳимоя қиламиз ва ҳурмат қиламиз, аммо бу уларга ҳамма нарса мумкин дегани эмас. Ўз фикрини билдириш зўравонликсиз, вайронкорликсиз ва нафратсиз амалга оширилиши керак”, — деди Байден.
Норозилик намойишлари уни Яқин Шарқ минтақасига нисбатан сиёсатини ўзгартиришга ундадими, деган саволга Байден: “Йўқ” деб жавоб берди.
Байден, шунингдек, АҚШда исломофобия ва бошқа камситишларга ўрин йўқлиги каби антисемитизм ва яҳудий талабаларга нисбатан таҳдидларга ҳам йўл қўйилмаслигини айтди.
Америка университетларида норозилик намойишлари тахминан икки ҳафта олдин бошланган. Уларда, асосан, таълим муассасалари раҳбариятига рози бўлмаган Фаластин тарафдори талабалар қатнашмоқда. Ёшлар АҚШнинг ўнлаб университетларида намойиш ўтказиб, раҳбариятдан Исроил ёки Ғазо секторидаги можарога алоқадор компаниялар билан ҳар қандай алоқани узишни талаб қилмоқда.
Изоҳ (0)