Ижтимоий тармоқларда грант асосида таҳсил олган ОТМ битирувчиларини мажбурий тартибда камида 3 йил ишлаб бериш талаби бекор бўлгани ҳақида хабарлар тарқалди. Олий таълим, фан ва инновациялар вазирлиги ахборот хизмати ҳолат юзасидан муносабат билдирди.
Таъкидланишича, президентнинг 2005 йил 2 июндаги қарори 6-бандида Олий ва ўрта махсус таълим вазирлигига тегишли вазирлик ва идоралар билан биргаликда Кадрларни давлат грантлари асосида мақсадли тайёрлаш тўғрисидаги низомни ишлаб чиқиш юклатилган.
Мазкур топшириққа мувофиқ, 2005 йил 7 июлдаги 58, 154-1, 19 ва 02/2658-сонли қарор билан Кадрларни давлат грантлари асосида мақсадли тайёрлаш тартиби тўғрисида низом тасдиқланган. Унда олий таълим муассасаларини давлат гранти асосида таҳсил олиб тамомлаган битирувчиларнинг уч йил ишлаб бериш мажбурияти белгиланган.
Давлат раҳбарининг 2022 йил 15 июндаги 279-сон қарори 3-иловасига мувофиқ президентнинг айрим қарорлари, жумладан, 2005 йил 2 июндаги 92-сон қарори ўз кучини йўқотган деб ҳисобланди. Аммо мазкур қарор ижросига кўра ишлаб чиқилиб, тасдиқланган Кадрларни давлат грантлари асосида мақсадли тайёрлаш тартиби тўғрисидаги низом ўз кучини йўқотмаган.
Шунга кўра, ҳозирга қадар низомдаги тартиблар янги ҳуқуқий нормаларга зид эмас ва ушбу низомни ўз кучини йўқотган деб топиш бўйича қоида бирор-бир норматив ҳужжатда кўзда тутилмаган. Олий таълим муассасаларини давлат гранти асосида тамомлаган битирувчиларнинг уч йил ишлаб бериш мажбурияти ҳозирги кунда ҳам амал қилади.
“Шу ўринда, барча ижтимоий тармоқ фойдаланувчиларидан фақат расмий манбалар орқали эълон қилинадиган хабарларни тарқатишларини сўраб қолардик”, дейилади Олий таълим, фан ва инновациялар вазирлиги ахборот хизмати хабарида.
Изоҳ (0)