Hakamni tepgan “Neftchi W” futbolchisi mavsum oxirigacha diskvalifikatsiya qilindi. O‘FA Tartib-intizom qo‘mitasi qarorlari e’lon qilindi

O‘zbekiston futbol assotsiatsiyasi (O‘FA) Tartib-intizom qo‘mitasi 19-may kuni navbatdagi qarorlarini ma’lum qildi.

Superliga 7-turi doirasida o‘tgan “Surxon” — “Bunyodkor” uchrashuvida raqib oyog‘iga butsining tag qismi bilan zarba bergani uchun Termiz klubi futbolchisi Asadbek Karimov 3 ta o‘yinga chetlashtirilgan.

Mazkur turdagi “Nasaf” — “Olimpik” o‘yinida mehmonlar o‘yinchisi Shahzod Toirov oyog‘ining tag qismi bilan raqibining bosh qismiga zarba bergani uchun 3 ta o‘yinga diskvalifikatsiya qilingan va jarimaga tortilgan.

Ushbu tur doirasidagi “Turon” — “Navbahor” bahsida raqibining tizzasiga butsining tag qismi bilan zarba bergani uchun namanganliklar futbolchisi Jamshid Boltaboyev 2 ta o‘yinga chetlatilgan.

Shuningdek, qo‘mita ayollar Oliy Ligasi 2-turi doirasidagi “Buxoro W” va “Neftchi W” jamoalari o‘rtasidagi o‘yinda yuz bergan ko‘ngilsiz holat bo‘yicha ham o‘z qarorini e’lon qildi.

“Neftchi W” futbolchisi Shahnoza Yusupova uchrashuvda yon hakamga nisbatan haqoratli so‘zlar ishlatgani uchun maydondan chetlatilgan. Shundan keyin u bosh hakamning orqasidan kelib uning bosh qismiga zarba bergani, bosh hakam zarbadan so‘ng yiqilib tushgani, shuningdek, bosh hakamning yelka qismiga tepgani qayd etilgan.

Tartib-intizom qo‘mitasining qaroriga ko‘ra, Shahnoza Yusupovaga 2023-yilgi mavsumning oxiriga qadar chetlashtirish intizom chorasi qo‘llanildi. “Neftchi” futbol klubi esa jarimaga tortildi.

Qayd etish kerak, ayollar Oliy Ligasida 6 ta tur o‘yinlari ortda qolgan.