“Дарё” ЕТТБ қандай ташкилот экани ва унинг Самарқанддаги йиғилишида қандай масалалар кўрилиши бўйича маълумот беради.
Ўзбекистонда Европа тикланиш ва тараққиёт банки Бошқарувчилар кенгашининг 32 йиллик йиғилиши бошланди. Тадбир “Мувофиқликка сармоя киритиш” (Investing in Resilience) мавзусида ўтказилиши режалаштирилган.
Учрашув ва бизнес-форумда 2 000 дан ортиқ юқори мартабали давлат амалдорлари, молиявий ва корпоратив раҳбарлар, фуқаролик жамияти ва глобал оммавий ахборот воситалари вакиллари иштирок этади.
Тадбир 12 йил ичида биринчи марта Марказий Осиё мамлакатида ўтказилмоқда. У ЕТТБга, шунингдек, ўтган йил давомида эришган ютуқларини кўриб чиқиш ва кейинги режаларини белгилаш имкониятини беради.
Бизнес-форумнинг асосий мавзуси барқарорликка сармоя киритиш бўлади. “Ўзбекистоннинг инвестицион истиқболлари тўғрисида”ги сессия ҳам йиғилишнинг марказий тадбирларидан бири ҳисобланади. Унда мамлакат иқтисодиётининг ўсиш истиқболлари ва сармоя киритиш имкониятлари муҳокама қилинади.
Шунингдек, уч кун давом этадиган тадбирда турли мавзуларда экспертлар иштирокида бир қатор муҳокама панел сессиялари ўрин олган.
ЕТТБ қандай ташкилот ва унинг асосий мақсади нима?
Европа тикланиш ва тараққиёт банки 1991 йилда тузилган халқаро молия институти ҳисобланади.
Ташкилотнинг асосий мақсади мамлакатларга бозор иқтисодиётига ўтишга ёрдам бериш, уларни жаҳон хўжалик ҳамжамиятига интеграциялашуви, таркибий ва иқтисодий ислоҳотларни амалга ошириш, шу жумладан монополиядан чиқариш, марказсизлаштириш, давлат тасарруфидан чиқариш ва хусусийлаштириш, хусусий тадбиркорликни ривожлантириш ҳисобланади.
Банк ташкил этилганидан бери умумий қиймати 180 миллиард евродан ортиқ бўлган 6 500 дан ортиқ лойиҳаларни амалга оширган.
ЕТТБнинг олий бошқарув органи бу Бошқарув кенгаши саналади. Директорлар кенгашига ЕТТБ президенти бошчилик қилади. Амалдаги президент франция фуқароси Одиль Рено-Бассо бўлиб, у 2020 йил июль ойидан бери шу лавозимда ишлайди.
Банкнинг устав капитали 30 миллиард еврони ташкил этади. ЕТТБ ўз облигацияларини халқаро молия бозорларида чиқариш орқали маблағ жалб қилади.
Бугунги кунга келиб, банк фаолияти Марказий ва Шарқий Европа, Марказий Осиё, МДҲ, Жанубий ва Шарқий Ўртаер денгизининг 35 та давлати ва Мўғулистонни қамраб олади.
Эслатиб ўтамиз, ташкилотнинг Одил Рено-Бассодан олдинги президенти Сума Чакрабарти Ўзбекистон Президенти Шавкат Мирзиёевнинг иқтисодий ривожланиш, самарали бошқарув ва халқаро ҳамкорлик масалалари бўйича маслаҳатчиси ҳисобланади. У президент маслаҳатчиси этиб 2020 йилда тайинланган. Бунга қадар ЕТТБ президенти сифатида фаолият юритган.
Ташкилотнинг Ўзбекистон билан ҳамкорлиги қай даражада?
Биргина 2022 йилнинг ўзида ЕТТБ мамлакатдаги 26 та лойиҳага 839 миллион евро сармоя киритди ва Ўзбекистон учинчи йилдирки Марказий Осиёда банкдан энг кўп маблағ жалб қиливчи давлат ҳисобланади. Ҳозиргача ЕТТБ Ўзбекистон бўйлаб 129 та лойиҳага 4 миллиард евродан ортиқ сармоя киритган. Уларнинг 70 таси (2,3 млрд евродан ортиқ) 2017 йилдан буён амалга оширилган.
Ўзбекистон ЕТТБга 1992 йил 30 апрелда аъзо бўлган. Мамлакат ЕТТБнинг Швейцария гуруҳига киради, ва бу гуруҳда Швейцария, Украина, Лихтенштейн, Туркманистон, Сербия, Черногория ва Молдова бор.
Банкнинг ваколатхонаси 1993 йил май ойида Тошкентда, 2019 йил октябрда Андижонда, 2021 йил июнда эса Урганчда очилган.
ЕТТБ 2022 йилда лойиҳаларга 839 миллион евро ажратди, бу эса 2021 йилга нисбатан 30 фоизга кўп.
Банк Ўзбекистондаги фаолиятида давлат корхоналари ва банкларини ўзгартириш ва хусусийлаштириш, тўғридан тўғри хорижий инвестицияларни жалб этиш, яшил ривожланиш лойиҳалари, энергетика ва транспортни қўллаб-қувватлаш, давлат-хусусий шерикликнинг самарали механизмларини жорий этиш, шунингдек, аёллар ва ёшлар тадбиркорлиги дастурларини қўллаб-қувватлашга алоҳида эътибор қаратади.
Банк Бухоро вилоятида умумий қуввати 1 ГВт бўлган иккита шамол электр станциясини қуриш учун 520 миллион доллар ажратган. Бундан ташқари Саримай ва Жанкелди қишлоқлари ўртасида узунлиги 120 км бўлган юқори волтли электр узатиш линиясини қуришда ҳам иштирок этмоқда.
Изоҳ (0)